Қазақ боксшылары Париж Олимпиадасына 5 жолдама жеңіп алды

Италияның Бусто-Арсицио қаласында өткен Париж Олимпиадасының алғашқы іріктеу турнирінде қазақ боксшылары тағы 5 жолдама жеңіп алды.

Бұған дейін Қамшыбек Қоңқабаев пен Карина Ибрагимовада ғана лицензия болған еді. 

8 күнге созылған Италия жеріндегі жарыста дүниежүзінің 144 елінен 700-ден аса былғары қолғап шебері бақ сынады.

Мырзағали Айтжановтан тәлім алатын ерлер құрамасы алты салмақ дәрежесінде өнер көрсетіп соның бесеуінен жолдама алды.

Алдымен 92 келіге дейінгі салмақ дәрежесінде Айбек Оралбай америкалық қарсыласын ұтып, командалас әріптестеріне жеңісті жолды бастап берсе, артынша 51 келі салмақта Олимпиада ойындарының қола жүлдегері Сәкен Бибосынов тартысты жекпе-жекте ұлыбританиялықты ұтты.

57 келіге дейінгі салмақ дәрежесінде Махмұд Сабырхан өз шеберлігін паш ете біліп, тәжікстандық қарсыласынан мықты екендігін байқатып, жолдаманы жеңіп алды.

71 келіде өте шиленісті жағдайда өткен кездесуде әзербайжандықты қапы қалдырып кеткен Асланбек Шымбергенов те Олимпиадаға баратын болды. Ал соңғы болып шаршы алаңға шыққан 80 келі салмақта өнер көрсеткен Нұрбек Оралбай тартысты кездесуде ирландиялықты ұтып, бесінші жолдаманы қоржынға салды.

Ал өкінішке қарай жолдама үшін шаршы алаңға шыққан қыздардың ешқайсысы лицензия иелене алмады. Енді жолдама ала алмаған бір жігіт және бес қыз мамырдың соңында Тайландта өтетін ақырғы лицензиялық турнирге дайындалмақ.