«Қайрат» Чемпиондар лигасындағы алғашқы ұпайын алды

Алматыда өткен УЕФА Чемпиондар лигасының топтық кезеңіндегі үшінші тур ойынында «Қайрат» пен кипрлік «Пафос» командалары 0:0 есебімен тең түсті.

Ойын 21 қазан күні Алматының Орталық стадионында өтті. Кездесу барысында қонақтар командасы төртінші минутта-ақ ойыншысы Араухо Корреяның тікелей қызыл қағаз алуына байланысты алаңда он адаммен қалды. Соған қарамастан, алматылықтар басымдықты пайдалана алмады.

Екінші таймда алматылықтар белсенді ойнағанымен, нақты нәтиже шығара алмады. 72-минутта  Драгомирдің соққысы қақпа маңдайшасынан кері серпіліп, Темірлан Анарбековтің арқасына тиіп, қақпаға еніп кетті. Алайда гол офсайд жағдайына байланысты VAR жүйесі арқылы есепке алынған жоқ.

Матч 0:0 есебімен аяқталып, командалар бір-бір ұпайдан еншіледі.

Бұл «Қайрат» үшін Чемпиондар лигасының жалпы кезеңіндегі алғашқы ұпай болды. Бұған дейін алматылық клуб сырт алаңда «Спортингтен» (1:4) және өз алаңында «Реалдан» (0:5) ұтылған еді.