Қарабұлақ ауылы мүмкіндігі бола тұра қала мәртебесін алудан бас тартты. Не үшін?

Түркістан облысы Сайрам ауданы Қарабұлақ ауылының халқы 53 мыңнан асып отыр. Премьер-министр Олжас Бектайұлы аталған жағдайды ескере отырып Түркістан облысының әкімі Дархан Сатыбалдыға Қарабұлақ ауылына қала статусын беруді ұсынды. Алайда, өңір басшысы қала мәртебесін алған жағдайда бірқатар мүмкіндіктерден шектелетінін айтып, Үкімет басшысының ұсынысынан бас тартты. 

Егер Қарабұлақ ауылына «Аудандық маңызы бар қала» статусын берген жағдайда ауыл халқы мына мүмкіндіктерден қол үзіп қалады:

1.    ҰБТ кезінде оқушыларға берілетін ауылдық квота алынып тасталады. 
2.    «Дипломмен ауылға» бағдарламасы бойынша жас мамандарға көрсетілетін әлеуметтік қолдау шаралары көрсетілмейді. 
3.    Ауыл тұрғындарының «Ауыл аманаты» бағдарламасы аясында 2,5 % несие алып, кәсібін ашуға мүмкіндіктері болмайды. 
4.    «Ауыл Ел бесігі» бағдарламасы аясында ауылды дамыту бойынша жобаларды іске асыру мүмкіндігі болмайды. 
5.    Қала мәртебесін алған жағдайда ауыл тұрғындарының негізгі кәсібі мал щаруашылығын дамытуға мүмкіндіктері болмайды. 

Ал керісінше қала мәртебесін алса шағын кәсіпкерлік дамып, көп қабатты тұрғын үй құрылысын жүргізуге мүмкіндігі болады. Қала және көршілес елді мекендердің тұрғындары үшін қызмет атқаратын тұрмыстық қызмет көрсету орталықтары ашылып, қосымша жұмыс орындары пайда болатын еді. 

«Жергілікті тұрғындармен бұл мәселені талқыладық. Олардың барлығы қарсы болып отыр. Және де бізде тиімсіз деп есептейміз»,-деді Түркістан облысының әкімі Дархан Сатыбалды.