Ең төменгі жалақы мөлшері қаншаға өсуі мүмкін?

Елімізде ең төменгі жалақы мөлшерін есептеудің жаңа әдістемесіне сай, оның көлемі 2026 жылы 90 мың теңгеден асып кетуі мүмкін. Бұл туралы Қаржы министрі Мәди Тәкиев парламент палаталарының бірлескен отырысынан кейін журналистерге айтты.

«ЕТЖ бойынша есеп жүргізіліп жатыр. Бұл бағытпен Еңбек министрлігі мен Экономика министрлігі айналысады. Соңғы үш жылдағы орташа өсім есепке алынады. Сондықтан, шамамен 90 мың теңгеден сәл асады деп ойлаймын. Бірақ нақты есеп әлі аяқталған жоқ», – деді министр.

Биыл Қазақстанда ең төменгі жалақы көлемі – 85 мың теңге. Ал медианалық жалақы – 300 мың теңге.

Еске салайық, 2026 жылдың 1 қаңтарынан бастап ЕТЖ мөлшерін есептеу әдістемесі өзгермек. Жаңа тәсілде еңбек өнімділігі, медианалық жалақы және инфляция деңгейі ескеріледі. Барлық зерттеу жұмыстары биыл аяқталып, соның негізінде жаңа ең төменгі жалақы көлемі бекітіледі.