Елтаңба авторы президент ұсынысына қатысты пікірін айтты

Мемлекет рәмізі авторларының бірі Жандарбек Мәлібеков президент Қасым-Жомарт Тоқаевтың Атыраудағы ұлттық құрылтай кезінде айтқан мемлекеттік елтаңбаны өзгерту туралы ұсынысын жан-жақты талқылау керегін айтады.

«Президент айтқаннан кейін ол бекерден бекер айтпайды, біліп айтады. Сондықтан да президентке қарсы шыға алмаймын. Мен жасаған елтаңбаны парламент мақұлдады, 30 жыл елге қызмет етті. Заман өзгереді. Бұл мәселені жан-жақты қарау керек, комиссия талқылауы керек. Халық шешеді, парламент шешеді», – деді ол.

Қазақстан президенті Ұлттық құрылтай кезінде елтаңбада совет кезеңін еске салатын белгілер барын меңзеді. Кей жұрт "президент елтаңбадағы бесжұлдызды айтып тұр" деп топшылады.

"Бұл символды адамзат ежелгі заманнан бері пайдаланып келеді, ол адамдардың ақиқат сәулесіне, барлық игі аңсарларға және мәңгілік құндылықтарға деген ұдайы ұмтылысын білдіреді. Мемлекеттік елтаңбада жұлдыздың бейнеленуі қазақстандықтардың әлемнің барлық халықтарымен ынтымақтастық пен серіктестік орнатуға ниетті ел болуға деген талпынысын танытады. Қазақстан тұрғындарының жүрегі мен құшағы бес құрлықтың өкілдері үшін қашанда ашық", - делінген Ақорданың елтаңбаны сипаттаған материалында.

Қазіргі елтаңба 1992 жылы ресми түрде қабылданды. Оның авторлары – белгілі сәулетшілер Жандарбек Мәлібеков пен марқұм Шот-Аман Уәлиханов.