Бұрынғы министрді қамауда ұстау мерзімі ұзартылды

Астана қаласының мамандандырылған ауданаралық тергеу соты  бұрынғы Әділет министрі Марат Бекетаевты қамауда ұстау мерзімі тағы ұзарғаны туралы хабарлады.

«Астана қаласының мамандандырылған ауданаралық тергеу сотымен күдікті М. Бекетаевқа қатысты күзетпен ұстау түріндегі бұлтартпау шарасын 2024 жылғы 21 наурызға дейін ұзарту санкцияланды. Өзге мәліметтер ҚР Қылмыстық-процестік кодексінің 201-бабына сәйкес жариялануға жатпайды», – деп жазылған хабарламада.

Еске сала кетсек, былтыр 23 қазанда Сыбайлас жемқорлыққа қарсы іс-қимыл агенттігі бұрынғы Әділет министрі Марат Бекетаевтың ұсталғанын растады.

Экс-министрге қатысты тергеп-тексеру жұмыстарын Сыбайлас жемқорлыққа қарсы қызмет жүргізіп жатыр. Марат Бекетаев қылмыстық кодекстің 361-бабы 4-бөлігінің 3-тармағы бойынша күдікке іліккен. Бұл бапта жауапты мемлекеттiк лауазымды атқаратын адамдың лауазымдық өкiлетін теріс пайдалануы ауыр салдарға алып келген жағдай көрсетілген.

Заңға сәйкес, кінәсі дәлелденсе, күдіктінің мүлкі тәркіленіп, лауазымды атқару немесе белгілі бір қызметпен айналысу құқығынан өмір бойына айырылады. Сондай-ақ 7 жылға дейінгі уақытқа бас бостандығын шектеу не бас бостандығынан айыру көзделген.

Марат Бекетаев 2016 жылы 13 қыркүйекте және 2019 жылы 25 ақпанда екі рет Әділет министрі болып тағайындалған. «Қаңтар оқиғасынан» кейін қызметінен айырылған.