Бурабайдағы Жұмбақтасқа шығуға тыйым салынды

«Бурабай» мемлекеттік ұлттық табиғи паркі Жұмбақтас жартасына шығуға тыйым салынатынын ескертті. Бұл туралы парк әкімшілігі Instagram парақшасында хабарлады.

«Жұмбақтас – эстетикалық қана емес, мәдени маңызы бар бірегей табиғи ескерткіш. Жартастың басына шығуға қатаң тыйым салынады! Бұл табиғатты қорғау ережелерін бұзып қана қоймай, адамның өмірі мен денсаулығына қауіп төндіреді», – делінген ресми хабарламада.

Парк өкілдері Жұмбақтасқа барушыларды табиғатқа ұқыпты қарауға, белгіленген шектеулерді сақтауға шақырды. Тыйымды елемегендерге әкімшілік жаза қолданылады.

«Бурабай» мемлекеттік ұлттық табиғи паркі – Қазақстанның Ақмола облысы, Бурабай ауданында орналасқан, Бурабай көлі мен оны қоршаған орман-тоғай, тау мен жартас секілді бірегей табиғи ландшафтарды қамтитын ерекше қорғалатын аумақ. Ұлттық парк Қазақстан Республикасы Президентінің Іс басқармасына қарайды.