Бүгін Қазақстан футбол құрамасы Грекиямен кездеседі

Наурыздың 21-нен 22-сіне қараған түні Қазақстан футбол құрамасы Ұлттар лигасының плей-офф кезеңінің жартылай финалында Грекия құрамасымен сырт алаңда кездеседі.

Грекия мен Қазақстан арасындағы матч Афинада, Айя София стадионында өтеді. Тікелей эфир Астана уақытымен 00:35-те басталады. Ойынды Qazsport және Qazaqstan телеарналарынан тікелей эфирде тамашалай аласыздар.

Естеріңізге сала кетейік, Грекия-Қазақстан кездесуінің жеңімпазы Грузия-Люксембург текетіресінің жеңімпазымен Ұлттар лигасының плей-офф кезеңінің финалына шығады. Финал жеңімпазы 2024 жылғы футболдан Еуропа чемпионатында ойнау құқығына ие болады.

ФИФА рейтингінде Грекия құрамасы 49-орында, ал Қазақстан 100-орынға тұрақтаған.

Грекия құрамасының бас бапкері Густаво Пойет Қазақстанмен матч алдындағы баспасөз мәслихатында қарсыласының жетістіктерін өз командасының жетістіктерімен салыстырды.

«Қазақстан соңғы бірнеше жылда үлкен жетістіктерге жеткен команда. Олардың ілгерілеуі біздікінен де жоғары. Дегенмен, біз қабілетімізді көрсетуге дайынбыз», - деді Пойет.

Ал Қазақстан құрамасының бас бапкері Магомед Адиев ойын алды баспасөз мәслихатында команда қорғаныс арқылы ойнай ма деген сұраққа жауап берді.

“Грекия құрамасының бас бапкері біздің команданың қалай ойнайтынын жақсы білетінін айтты. Тек қана қорғаныс арқылы ойнау деген ұғымнан әлем футболы арылды. Даниямен болған ойында да қорғаныста қымтанып жатып алмадық. Ертеңгі матчқа да ондай жоспарымыз жоқ. Дегенмен матчтан кейін бір команданың бақытсыз күй кешетіні белгілі. Тең нәтиже болмайды. Біз де, қарсыласымыз да бағымызды шабуылдан іздейтін боламыз”, - деді Адиев.