Астаналықтар Ресей елшілігі алдына гүл шоқтарын қойды

Астаналықтар Ресей Федерациясы елшілігіне гүл шоқтарын қойып, көңіл айту жазбасын қалдырды. Бұл туралы елшіліктің баспасөз қызметі хабарлады.

«Мәскеудегі террористік актіге байланысты көңіл айтқысы келетіндер көбейді. Сондықтан Ресейдің Қазақстандағы елшілігі Көңіл айту кітабын ашты. Көңіл айту бұрышы Жұмабек Тәшенов көшесі тарапынан Елшіліктің консулдық бөліміне кіре берісте орналасқан», - деп хабарлады елшілік өзінің ресми сайтында.

22 наурызда кешке Мәскеу маңындағы "Крокус сити холл" концерт залдың ішінде камуфляж киген бірнеше адам жұртқа оқ жаудырған, ізінше ғимаратта жарылыс болып, өрт шықты.

Аталған концерт залдағы атыс пен өрттің салдарынан кемінде 115 адам қаза болған. Қаза тапқандар саны артуы мүмкін.

Қайғылы оқиғаға байланысты Қазақстан азаматтары үшін мына сенім телефоны бойынша жедел желі іске қосылды: 8 (925) 897-71-14.

Қазақстан Сыртқы істер министрлігі хабарлағандай, Ресейдегі терактіде қаза тапқандар мен зардап шеккендер арасында қазақстандықтардың болғаны туралы ақпарат жоқ.