"Зейнетақы – табыс емес, күнкөріс құралы": Депутат зейнеткерлердің табысын несие үшін алуға тыйым салуды ұсынды

Мәжіліс депутаты Ерлан Стамбеков өзінің депутаттық сауалын Қаржы нарығын реттеу және дамыту агенттігіне, Әділет министрлігіне, Еңбек және халықты әлеуметтік қорғау министрлігіне жолдады. Ол әлеуметтік осал санаттағы азаматтардың қарызға батуы мен құқықтық қорғалмауы мәселесін шұғыл түрде шешуді талап етті.

Ресми дерек бойынша, елімізде 3,2 миллионнан астам азамат әлеуметтік осал топқа жатады. Олардың қатарында зейнеткерлер, мүгедектігі бар жандар, мүгедек бала тәрбиелеп отырған отбасылар мен әлеуметтік көмек алушылар бар. Көпшілігі үшін зейнетақы мен жәрдемақы — жалғыз күнкөріс көзі. Алайда банктер мен микроқаржылық ұйымдар осы қаражатты кіріс ретінде есептеп, азаматтарды несиеге батырып, кейін сол ақшадан қарыз өндіреді.

Стамбеков Алматыдағы Қожабергенов Жантөре есімді 2-топ мүгедегінің мысалын келтірді. Ол 15 млн теңге қарыз үшін жәрдемақысынан толықтай айырылған. Тағы бір мысал – 72 жастағы Ирина Скрипникова алаяқтардың арбауына түсіп қалған. Олар зейнеткердің атынан тұтынушылық несие рәсімдеген. Сол кезде банк оның жалғыз табыс көзі – зейнетақысын есепке алып, несиені мақұлдаған.

Депутат төмендегі ұсыныстарды жеткізді:

• Әлеуметтік осал азаматтар үшін банкрот болу рәсімін жеңілдету;

• Зейнетақы мен жәрдемақыны табыс ретінде есептеуге тыйым салу;

• Осы төлемдерден қарыз өндіріп алуға заңмен шектеу қою.

Сондай-ақ ол уәкілетті органдардан мұндай жағдайлардың ауқымын, себеп-салдарын зерттеп, зейнетақы мен жәрдемақы секілді өмірлік маңызды кірісті қорғаудың нақты тетіктерін әзірлеуді сұрады.