Шығыс Қазақстанның Польшаға экспорты 17 пайызға өсті

Шығыс Қазақстан облысының әкімі Нұрымбет Сақтағанов Польшаның Қазақстандағы уақытша сенімді өкілі Михал Лабендамен кездесіп, сауда-экономикалық және инвестициялық ынтымақтастықты кеңейту мәселелерін талқылады. Биыл қаңтар-шілде аралығында Шығыс Қазақстан мен Польша арасындағы тауар айналымы шамамен 4,9 млн АҚШ долларын құрады.

Өткен жылдың сәйкес кезеңінде екі тарап арасындағы сауда көлемі 4,4 млн доллар болған. Биыл Шығыс Қазақстаннан Польшаға шығарылған тауар көлемі 17 пайызға артып, 2,5 млн доллардан асты. 2025 жылдың осы кезеңінде бұл көрсеткіш 2,17 млн доллар шамасында болған.

Өңірдің Польшаға шығаратын өнімдерінің басым бөлігі ауыл шаруашылығы саласына тиесілі. Экспорттың 40 пайызын зығыр тұқымы, 39 пайызын рапс тұқымы, тағы 14 пайызын өсімдік тектес материалдар құрайды.

Кездесуде тараптар бұған дейінгі бірлескен жұмыстың нәтижелерін саралап, алдағы уақытта серіктестікті дамытуға болатын бағыттарды қарастырды. Облыс әкімі өңірде жаңа инвестициялық жобаларды жүзеге асыруға мүмкіндік бар екенін айтып, әсіресе агроөнеркәсіп саласына қызығушылық жоғары екенін атап өтті.

«Біздің өңір жаңа бірлескен инвестициялық жобаларды жүзеге асыруға ашық. Өзара ынтымақтастыққа деген қызығушылықтың артып келе жатқанын нақты көрсеткіштерден де көруге болады. Әсіресе агроөнеркәсіптік кешенге қызығушылық жоғары. Біз инвесторларға қажетті қолдау көрсетіп, Шығыс Қазақстан аумағында бизнес жүргізуге қолайлы жағдай жасауға дайынбыз», – деді Нұрымбет Сақтағанов.

Польшаның Қазақстандағы уақытша сенімді өкілі Михал Лабенда Шығыс Қазақстанның экономикалық мүмкіндігін жоғары бағалады. Оның айтуынша, Польша өңірмен ауыл шаруашылығы өнімдерінің саудасын ғана емес, өнеркәсіптік және технологиялық ынтымақтастықты да кеңейтуге мүдделі.

«Польша Шығыс Қазақстанды сенімді әрі стратегиялық маңызы бар серіктес ретінде қарастырады. Біз сапалы ауыл шаруашылығы өнімдерін тұрақты жеткізуге ғана емес, екі ел кәсіпорындары арасындағы өнеркәсіптік және технологиялық ынтымақтастықты кеңейтуге де мүдделіміз», – деді Михал Лабенда.

Биыл Польшадан Шығыс Қазақстанға жеткізілген тауар көлемі 2,28 млн долларға жуықтады. Былтыр осы кезеңде импорт шамамен 2,24 млн доллар болған. Польшадан әкелінетін өнімдердің 14 пайызын полиацетальдар, полиэфирлер мен эпоксидті шайырлар, 12 пайызын жасанды полимерлер негізіндегі бояулар мен лактар құрайды. Құю қалыптарына арналған дайын байланыстырушы заттар мен өзге де химиялық өнімдердің үлесі – 9,5 пайыз.

Кездесу қорытындысында тараптар өзара байланысты жалғастырып, Шығыс Қазақстан мен Польшаның кәсіпкерлік ортасы арасында тікелей қарым-қатынас орнатуға жәрдемдесуге уағдаласты.