Жоғары технологиялық ортопедиялық операциялар енді өңірлерде де тегін жасалуда

Қазақстанда жоғары технологиялық медициналық оталар тек елордалық клиникалардың еншісінде болудан қалды. Бүгінде мемлекет есебінен омыртқаға хирургиялық араласу, буындарды ауыстыру және артроскопия сияқты мыңдаған тегін операциялар сәтті жүзеге асырылуда. Инновациялық әдістердің клиникалық практикаға енгізілуі мен ел бойынша тегін емдеу сапасын арттыру бағытындағы атқарылып жатқан жұмыстар туралы Қазақстан Республикасы Денсаулық сақтау министрлігі хабарлады.

Ведомство берген ресми мәліметке сүйенсек, елімізде жыл сайын Тегін медициналық көмектің кепілдендірілген көлемі (ТМККК) мен Міндетті әлеуметтік медициналық сақтандыру (МӘМС) шеңберінде 130 мыңнан астам хирургиялық ота жасалады. Бұл көрсеткішке шұғыл да, жоспарлы да медициналық араласулар кіреді.

Өткен жылдың қорытындысы бойынша жоғары технологиялық медициналық көмек аясында 1,5 мың ота орындалды. Соның ішінде омыртқаға жасалған 300-ден астам операция, 1 мыңнан астам қайталама (ревизиялық) эндопротездеу және ірі буындарға жасалған 4,5 мыңға жуық артроскопиялық ота бар.

Сонымен қатар отандық медициналық практикаға омыртқа хирургиясындағы навигациялық жүйелер, эндопротездеудегі роботтандырылған технологиялар, буынның дегенеративті аурулары кезінде қолданылатын клеткалық әдістер және күрделі реконструкцияларға арналған 3D-жеке импланттар сияқты заманауи тәсілдер кезең-кезеңімен енгізілуде.

Денсаулық сақтау министрлігі өңірлік травматологиялық қызметті күшейтуді жоспарлап отыр. Осылайша, 2027 жылға дейін елімізде өңірлік травматологиялық орталықтар желісін құру және шокқа қарсы бөлімшелерді жаңарту көзделген. Сонымен бірге шұғыл медициналық көмекті арттыру мен жарақаттанудың алдын алу шаралары қарқынды жүргізілмек. Қазіргі таңда Қазақстанда 1,5 мыңнан астам травматолог дәрігер еңбек етеді, 81 травмпункт, 4 мыңнан астам мамандандырылған койка-орын және 260 медициналық ұйым халыққа арнаулы ортопедиялық көмек көрсетіп келеді.