Сүт безі қатерлі ісігі: Неге ерлердің өлім-жітімі әйелдерден жоғары?

Сүт безінің қатерлі ісігі әйелдер арасында ең көп таралған онкологиялық ауру саналады, алайда бұл дерт ер адамдарда да кездеседі. Дегенмен медицинада ерлердегі бұл қатерлі ісікті емдеу бойынша нақты бірізді әдіс әлі қалыптаспаған. Қазіргі таңда емдеу тәсілдері негізінен әйелдерде қолданылатын тәжірибеге сүйенеді, деп хабарлады DW.

Германияның Эрланген қаласындағы Бавария денсаулық сақтау және азық-түлік қауіпсіздігі ведомствосы жариялаған жаңа зерттеу мәліметтеріне сәйкес, ерлер бұл дертке сирек шалдыққанымен, олардың өлім-жітім көрсеткіші әйелдерге қарағанда жоғары. Зерттеу нәтижелеріне сүйенсек, сүт безі қатерлі ісігі анықталғаннан кейін бес жыл өмір сүретін әйелдердің үлесі 80,4% болса, ер адамдар арасында бұл көрсеткіш шамамен 70%-ды құрайды.

Ғалымдар 2000 жылдың 1 қаңтарынан 2018 жылдың 21 желтоқсанына дейін сүт безі қатерлі ісігі диагнозы қойылған 2500 ер адам мен 307 мыңнан астам әйелдің деректерін зерттеді. Сарапшылардың пікірінше, ер адамдар бұл дертке сирек шалдығатындықтан, оның диагностикасы, емдеу әдістері және болжамдары туралы ғылыми мәліметтер жеткіліксіз.

Ерлер неге сүт безі қатерлі ісігінен жиі қайтыс болады?

Ғалымдар ер адамдардың сүт безі қатерлі ісігіне шалдығу қаупі 0,1%-ды құрайтынын, ал әйелдерде бұл көрсеткіш 13,2% екенін анықтады. Германияның Роберт Кох институтының дерегіне сүйенсек, 2020 жылы бұл дерт 70 550 әйел мен 740 ер адамнан анықталған. Жыл сайын Германияда шамамен 700 ер адамға осы диагноз қойылады.

Зерттеушілер ерлер арасындағы өлім-жітімнің жоғары болу себептерін талдап, мынадай негізгі факторларды анықтады:

• Ерлерде қатерлі ісік анықталған кезде ол жиі кеш сатысында болып, емдеу қиындайды.
• Диагноз қойылған кездегі науқас ерлердің орташа жасы әйелдерге қарағанда жоғары.
• Ер адамдар бұл ауруға аса мән бермей, профилактикалық тексерулерден сирек өтеді.

Дегенмен тіпті осы факторларды ескермегеннің өзінде, ерлердегі өлім-жітім деңгейі әйелдерден жоғары болып қала береді. Сарапшылардың пікірінше, бұған генетикалық ерекшеліктер, өмір салты және биологиялық факторлар әсер етеді.

Бавариялық ғалымдар ер адамдар уақытылы ем қабылдаған жағдайда, олардың сауығу мүмкіндігі әйелдермен шамалас болатынын атап өтті. Сондықтан мамандар ер адамдарға да сүт безі аймағындағы өзгерістерге мән беріп, денсаулығына мұқият қарауға және тұрақты медициналық тексеруден өтуге кеңес береді.