Азиядағы табиғи апаттар: Бір аптада 1200 адам көз жұмды

Индонезияда өткен аптада болған жойқын су тасқыны салдарынан қаза тапқандар саны 631 адамға жетті. Елдің құтқару қызметтері әлі де қол жетпей жатқан аудандарға баруға тырысып жатыр. Табиғи апатқа Малакка бұғазы маңында қалыптасқан сирек циклон себеп болған, деп хабарлайды BBC.

Елдің үш бірдей провинциясы – Ачех, Солтүстік Суматра және Батыс Суматра қатты зардап шеккен. Жалпы 1,5 миллион адам апаттың әсерін сезінді. Әлі күнге дейін 500-ге жуық адам із-түзсіз.

Аймақтарда жолдардың жабылуы мен инфрақұрылымның қирауына байланысты құтқарушылар тек жаяу немесе мотоциклмен жетуге мәжбүр. Кей аудандарда тұрғындар екі-үш күн бойы азық-түліксіз отыр. 

Ачех аймағында су басқан шалғай ауылдарда байланыс толық үзілген. Мыңдаған адам Starlink құрылғысы орнатылған әкімдік ғимаратының маңына жиналып, жақындарымен сөйлесуге кезек күтіп тұр.

Қоғам арасында үкіметке деген наразылық күшейіп келеді. Белсенділер табиғи апат зардабын ормандарды заңсыз кесу, жерді дұрыс басқармау күшейткенін айтады. Ал президент Прабово Субианто жергілікті халықпен кездесуде билік «барлық қиындықты еңсеру үшін қолдан келгенін жасап жатқанын» атап өтті.

Тек Индонезия емес, соңғы бір апта ішінде Азияның бірнеше елі – Таиланд, Малайзия және Шри-Ланка да нөсер жаңбыр мен су тасқынынан зардап шекті. Жалпы өңір бойынша 1200 адамға жуық адам қаза тапқан.

Мамандар бұл апаттар солтүстік-шығыс муссоны, екі тропикалық циклонды және климат өзгерісін бірлескен фактор деп атап отыр. Ғалымдардың айтуынша, тропикалық дауылдар саны артпаса да, олардың әсері күшейіп, жауын мөлшері көбейіп келеді.