Головкинге жаңа мәртебе берілді

Қазақстандық бокс жұлдызы Геннадий Головкин Халықаралық бокс даңқ залына (International Boxing Hall of Fame) енеді. Бұл туралы RingMagazine басылымы хабарлады. Ресми ақпарат 4 желтоқсанда ұйымның Х әлеуметтік желісіндегі парақшасында жарияланды.

GGG Антонио Тарвер (АҚШ) және Найджел Бенн (Ұлыбритания) сынды әлемдік бокстың танымал есімдерімен бірге 2026 жылғы таңдаулы тізімге кірді.

Даңқ залына енгізу рәсімі 2026 жылдың 11–14 маусымы аралығында АҚШ-тың Нью-Йорк штатына қарасты Канастота қаласында өтеді.

Головкин – бұл марапатқа ие болған алғашқы қазақстандық

Геннадий Головкин – Халықаралық бокс даңқ залына енген тарихтағы алғашқы қазақстандық, сондай-ақ посткеңестік кеңістіктен төртінші боксшы. Бұған дейін бұл құрметке Костя Цзю мен Кличко ағайындылар ие болған еді.

GGG жетістіктері

Әуесқой бокс:

• 350 жекпе-жек, оның 345-інде жеңіс

• Әлем чемпионы

• Олимпиада ойындарының күміс жүлдегері

• Қазақстан құрамасының ұзақ жылдар бойғы көшбасшысы

Кәсіби рингте:

• Орта салмақта IBF, WBA және IBO чемпионы

• 45 жекпе-жек: 42 жеңіс, оның 37-сі нокаутпен

• 23 нокауттық жеңіс қатарынан – орта салмақ тарихындағы ең ұзақ серия

• 21 рет титулын қорғаған – абсолютті рекорд

• 90%-дан асатын нокаут үлесі Гиннестің рекордтар кітабына енген

• Бірнеше жыл бойы әлемдік P4P (pound-for-pound) рейтингінің көшбасшысы

Геннадий Головкиннің аты әлемдік бокс тарихында алтын әріппен жазылатыны белгілі. 2026 жылы оның есімі ресми түрде бокстың ең даңқты тұлғаларының қатарына қосылады.