Қазақстандағы су тапшылығы: Үкімет 42 жаңа су қоймасын салуға кірісті

Қазақстан Үкіметі елдегі су тапшылығын жою және ирригациялық жүйелерді жаңғырту мақсатында 42 жаңа су қоймасын салуды және 37 нысанды қайта жөндеуді қолға алды. Бұл туралы Мәжілістің жалпы отырысында Премьер-Министрдің орынбасары Қанат Бозымбаев мәлімдеді.

Оның айтуынша, қазіргі таңда елдің су қауіпсіздігін қамтамасыз ету – стратегиялық маңызы бар міндеттердің бірі. Су ресурстарын ұтымды пайдалану және сақтау бағытында кешенді шаралар жүзеге асырылып жатыр.

«Су инфрақұрылымын дамыту жөніндегі кешенді жоспарға сәйкес, 42 жаңа су қоймасын салу және 37 нысанды қайта жаңарту көзделген. Сонымен қатар 14,5 мың шақырым суару желісі қалпына келтіріліп, 3,5 мың шақырымы цифрландырылатын болады», – деді Қанат Бозымбаев.

Биылдың өзінде Ақтөбе облысындағы Елек өзені су қоймасы мен Қызылорда су торабының жаңғырту жұмыстары аяқталған. Ал Түркістан облысында «Бәйдібек ата» және «Қарақуыс» су қоймаларының, Батыс Қазақстан облысында Киров су қоймасының құрылысы жалғасып жатыр.

Сонымен қатар Үкімет Ислам даму банкімен бірлесіп, үш жаңа су қоймасын салу, екі нысанды қайта жаңарту және 96 каналға күрделі жөндеу жұмыстарын жүргізуді жоспарлап отыр. Бұл жобалардың жалпы құны 1,2 миллиард долларды құрайды.

Бозымбаевтың айтуынша, 2024 жылы алты өңірде топтық су құбырларының сегіз жобасы аяқталып, 200 мыңнан астам тұрғын ауызсумен қамтылған.

Биылдың өзінде 255 ауылда жаңа су жүйелері салынып, 208 елді мекенде ескі желілер жаңартылып жатыр.

Үкіметтің мәліметінше, атқарылып жатқан жұмыстардың негізгі мақсаты – ауыл мен қала тұрғындарын сапалы ауызсумен толық қамтамасыз ету, су үнемдеу технологияларын енгізу және су ресурстарын тиімді басқару жүйесін қалыптастыру.