Президент білім және педагог мәртебесі туралы заңға қол қойды

Мемлекет басшысы Қасым-Жомарт Тоқаев мәдениет, білім беру, отбасы саясаты және мемлекеттік бақылау салаларына қатысты бірқатар заңнамалық актіге өзгерістер енгізуді қарастыратын заңға қол қойды. Құжат Жер, Бюджет, Кәсіпкерлік кодекстеріне, сондай-ақ «Білім туралы», «Педагог мәртебесі туралы», «Қазақстан Республикасындағы бала құқықтары туралы» және өзге де заңдарға түзетулер енгізуді көздейді.

Заңдағы негізгі өзгерістер төрт бағытқа бөлінеді.

Жетім балаларды қорғау тетіктері күшейеді

Енді бала асырап алу, қамқоршылық немесе қорғаншылық тағайындау кезінде басым құқық баланың жақын туыстарына беріледі. Туыстары болмаған жағдайда – некеде тұрған адамдарға приоритет жасалады. Бұл норма балалардың отбасылық ортада тәрбиелену мүмкіндігін арттырады.

Санитариялық бақылау жүйесі нақтыланды

Бюджет қаржысына балалардың тамағы, медициналық қызметі, тұратын орны немесе білім беруі қамтамасыз етілетін ұйымдар «Халық денсаулығы туралы» Кодекстің бақылау аясына көшеді. Осыған сәйкес, бұрынғы нормалар Кәсіпкерлік кодексінен алынып тасталады.

Білім беру жүйесіндегі жаңа ережелер

Техникалық және кәсіптік білім беру ұйымдары енді Оқу-ағарту министрлігі бекітетін рейтингтік бағалау әдістемесіне сай сараланады. Ал жоғары оқу орындары мен ЖОО кейінгі білім беретін мекемелерді бағалау Ғылым және жоғары білім министрлігі әзірлеген әдістеме бойынша жүргізіледі.

Мәдениет саласындағы жаңашылдықтар.

Концерттерде фонограмма пайдалануға ресми түрде тыйым салынады (телевизиялық түсірілімдер мен арнайы концерт залы емес орындардан бөлек).
Авторлық туындыларды медиада немесе онлайн жариялаған кезде автордың аты-жөнін көрсету міндетті болады.
Кітапхана қорын толықтыру мен сақтау енді жергілікті атқарушы органдардың құзыретіне беріледі.