Кубада масадан тарайтын індеттен 33 адам көз жұмды

Кубада соңғы айларда маса арқылы тарайтын қауіпті аурулар өршіп, кемінде 33 адамның өмірін қиды. Бұл жөнінде Reuters хабарлады.

Денсаулық сақтау вице-министрі Карильда Пеньяның айтуынша, қайтыс болғандардың 12-сі денге безгегінен, ал 21-і чикунгунья вирусынан көз жұмған. Марқұмдардың 21-і – 18 жасқа толмаған балалар.

Қай уақытта қайтыс болғаны нақтыланбағанымен, министр індеттің ел халқының үштен біріне әсер еткенін атап өтті.

Кубаның денсаулық сақтау жүйесі соңғы жылдары экономикалық дағдарыс, дәрі-дәрмек пен жанармай тапшылығынан ауыр күй кешіп отыр. Соның салдарынан жол бойындағы қоқысты тазалау мен дезинфекциялау жұмыстары бәсеңдеп, денге мен чикунгунья вирустарының таралуына жол ашылған.

Бұрын елде сирек кездесетін чикунгунья вирусы соңғы айларда жылдам тарап отыр. Ауруды негізінен Aedes тұқымдас масалар таратады. Бұл түр – денге мен Зика вирустарының да негізгі тасымалдаушысы.

Чикунгунья жоғары қызу, бас ауруы, бөртпе және буын ауруларын туғызады. Көп жағдайда өлімге әкелмесе де, жұқпадан кейін айлап буын ауруы мен әлсіздік сақталып, адамды мүгедектікке дейін жеткізуі мүмкін.

Қазіргі уақытта Гавана мен Сантьяго қалаларында жұқтыру деректері ең көп тіркеліп отыр. Соңғы аптада ғана елде 5 717 жаңа жағдай анықталған. Дегенмен билік көптеген адам дәрігерге жүгінбейтіндіктен, нақты статистика бұдан да жоғары болуы мүмкін екенін мойындады.

Дүниежүзілік денсаулық сақтау ұйымы (ДДҰ) шілде айында үндеу жасап, чикунгунья вирусының жаһандық таралу қаупі қайта күшейіп келе жатқанын ескерткен. Ұйым Үнді мұхиты аймағынан басталған жаңа ошақтар Еуропа мен Америкаға таралуы мүмкін екенін мәлімдеді.