«Астана Тазалық» қызметкерлерді баспанамен және әлеуметтік қолдаумен қамтуды күшейтті

Елордада «Астана Тазалық» кәсіпорны қысқы маусымға дайындықпен қатар, жұмысшылардың әлеуметтік жағдайын жақсартуға бағытталған жаңа жобаларын таныстырды. Пресс-тур барысында компания басшылығы соңғы бір жылда қызметкерлерге жасалған қолдаудың нақты нәтижелерін көрсетті.

Кәсіпорынның Бас директоры Замир Сагиновтың айтуынша, қаланың тәуліктік тазалығы мен қауіпсіздігі ең алдымен осы мамандардың еңбегіне тәуелді.
«Қалаға қамқорлық — ең алдымен сол жұмысты күнделікті атқарып жүрген адамға жасалған қамқорлықтан басталады», – деді ол.

Жұмысшыларға арналған демалыс бөлмелері толық жаңғыртылды

Астана қаласы әкімдігінің қолдауымен Есіл және Нұра аудандарында орналасқан 1000 шаршы метрден асатын 10 демалыс және тұрмыстық бөлме күрделі жөндеуден өтті.

Бұрын тар әрі қолайсыз, жертөле типтес бөлмелердің орнына қазір 200-ден астам жол жұмысшысы пайдаланатын кең, жылы, заманауи орындар пайда болды. Бұл бөлмелер қыс мезгілінде жылынып, тынығып, келесі ауысымға дайындалуға арналған барлық қажетті жабдықпен қамтылған.

Қызметкерлерді баспанамен қамтамасыз ету басталды

Компания қызметкерлерді баспанамен қамту бағытында бірнеше жобаны жүзеге асырды. Соның нәтижесінде:

• 10 қызметтік пәтер,

• 80 орындық жатақхана
  пайдалануға берілді.

Қазірдің өзінде 7 қызметкер жаңа пәтердің кілтін алып, қоныстойын атап өтті. Олардың қатарында бес жылдан бері кәсіпорында еңбек етіп жүрген арнайы техника жүргізушісі Бақытжан Абдуалиев және жас маман, бір жылдан астам уақыт бұрын жұмысқа келген Еркін Қадырбай бар.

Жалақы және әлеуметтік пакет жақсарды

Замир Сагинов жүргізушілер мен машинистердің айлығы қыс мезгілінде 700–800 мың теңге, жаз айларында 500–550 мың теңге екенін айтты.
Инженерлік-техникалық персонал 300–400 мың теңге аралығында табыс табады.

Кәсіподақпен бірлескен жұмыстың арқасында әлеуметтік пакет кеңейіп, материалдық көмек пен тұрмыстық қолдаудың жаңа түрлері енгізілді. Сонымен қатар, қызметкерлердің біліктілігін арттыру, еңбек мәдениетін нығайту және жас кадрларды тарту бағытында қосымша шаралар жүзеге асырылуда.