Алматы облысында жол апатынан жеті адам қаза тапты

Алматы облысында тағы да ауыр жол-көлік оқиғасы тіркелді. Бұл жолы Алматы–Бішкек трассасының 129-шақырымында болған апаттан жеті адам көз жұмды, деп хабарлады облыстық полиция департаменті.

Алдын ала деректерге қарағанда, Honda Odissei көлігінің жүргізушісі алда кетіп бара жатқан HOWO жүк көлігінің тіркемесіне соғылған.

«Жол апаты салдарынан жеңіл көліктегі жеті адамның бәрі, соның ішінде жүргізуші де алған жарақаттарынан оқиға орнында қаза болды», — делінген полицияның ресми хабарламасында.

Қазіргі таңда оқиға бойынша сотқа дейінгі тергеу басталды, апаттың нақты себебі анықталып жатыр.

Бұл – соңғы апталарда Алматы облысында тіркелген екінші ірі жол апаты. Бұған дейін, 24 қараша күні дәл осы бағыттағы 65-шақырымда Audi мен Toyota көліктері соқтығысып, алты адам қаза тапқан болатын.

Ал 17 қарашада Батыс Қазақстан облысында болған жол-көлік апатында сегіз адам мерт болып, төрт адам ауруханаға түскен еді. Ол кезде Toyota Camry мен Volkswagen Sharan көліктері бетпе-бет соқтығысып, бір көлік өртеніп кеткен.

Ішкі істер министрлігінің дерегінше, Қазақстанда жыл сайын шамамен 2,5 мың адам жол апатынан қаза табады. Статистика соңғы жылдары адам шығынының баяу болса да өсіп келе жатқанын көрсетіп отыр.