Жамбыл облысына тексеріс: 6 жылдан бері аяқталмай жатқан жоба анықталды

Жоғары аудиторлық палата Жамбыл облысында мемлекет қаржысының қалай жұмсалып жатқанын тексеріп, бірқатар ірі бұзушылықты анықтады. Аудит қорытындысы Палата отырысында жарияланды.

Өңірдің макроэкономикалық көрсеткіштері соңғы жылдары өсім көрсеткенімен, жалпы ішкі өнім құрылымындағы үлесі 2,7%-дан 2,3%-ға дейін төмендеген. Биылғы 10 айда тартылған инвестиция көлемі 553 млрд теңгеден асқан, бірақ облыс негізгі капиталға салынған инвестиция бойынша республикалық көшбасшылардан 3,5 есе артта қалып отыр.

Тексеру барысында бюджеттік жоспарлау, мемлекеттік сатып алу, инвестициялық жобаларды басқару және «Тараз» ӘКК қызметінде жүйелі кемшіліктер табылды.

Ең үлкен мәселе: 6 жылдан бері бітпей тұрған газ құбыры

Шу ауданының 18 елді мекеніне газ жеткізуге арналған жоба норматив бойынша 2 жылда аяқталуы тиіс болған, алайда 6 жылдан астам уақыт өтсе де, құрылыс әлі бітпеген.
Нәтижесінде 8,2 млрд теңге игерілмей, кері қайтарылған. Палата мұны қаражаттың тиімсіз пайдаланылуы деп бағалады.

Басқа анықталған бұзушылықтар

• 2020–2024 жылдары облыс бюджетінің 80% республикалық трансфертке тәуелді болған.

• Осы кезеңде 38 млрд теңгеден астам қаражат игерілмей қалған.

• 2021–2025 жылдарға арналған өңірді дамыту бағдарламасында кәріз-тазарту нысандарының жоқтығы, тұрғын үй кезегінің өсуі, суармалы жерлерге су үнемдеу технологияларының енгізілмеуі сияқты маңызды мәселелер мүлде қамтылмаған.

• Таразда мемлекеттік сатып алудың жабық форматы негізсіз қолданылған, бұл бәсекені шектеген.

• Орындалмаған жұмыс үшін ақша төленген жағдайлар бар. Мысалы, қалалық ТКШ бөлімі биыл маусымда жол жөндеу бойынша 537 млн теңге төлегенімен, жұмыс 70 күн бойы басталмаған. Ол тек аудит басталған соң ғана қолға алынған.

• «Тараз» ӘКК даму жоспарында тиімділік көрсеткіштері жоқ, ал бекітілген индикаторлар кейін «қол жеткізілген нәтижеге қарай» төмендетілген.

Аудиттің жалпы қорытындысы

• 58,5 млрд теңгеге қаржылық бұзушылық анықталды (оның 47,1 млрд теңгесі – бухгалтерлік есеп қателері).

• 75,6 млрд теңге тиімсіз жоспарланған немесе тиімсіз пайдаланылған.

Жоғары аудиторлық палата кемшіліктерді жою, жауапты тұлғаларды жауапқа тарту және қажетті заңнамалық өзгерістер енгізу жұмыстарын бақылауда ұстайтынын мәлімдеді.