Еуропалық Одақ Meta компаниясына қарсы WhatsApp-тағы жасанды интеллектіні тексеруді бастайды

Еуропалық Одақ (ЕО) Meta Platforms компаниясына қарсы жаңа тергеу бастамақ. Тергеудің себебі – компанияның WhatsApp мессенджеріне жасанды интеллект (AI) функцияларын енгізуі. Бұл жайында Financial Times хабарлады.

Meta AI наурыз айынан бастап Еуропа нарығында WhatsApp-та қолданыла бастады. Компания хабарламалар мен чаттарды автоматтандыру үшін бұл технологияны пайдаланған. Алайда ЕО бұл қадам нарықтағы бәсекелестікті бұзуы мүмкін деп қауіптенеді.

Италияның бәсекелестік агенттігі де биыл шілде айында зерттеу жүргізіп, Meta-ның өз үстемдігін пайдаланып, басқа AI чатботтарды платформадан бұғаттағанын тексеріп жатыр. Қазіргі кезде компания тергеу туралы ресми хабарлама алмағанын айтты. Еуропалық Одақ комиссиясының жақын күндері ресми мәлімдеме жасауы күтілуде.

Сарапшылардың айтуынша, тергеу дәстүрлі бәсекелестік ережелері бойынша жүргізіледі және Digital Markets Act заңымен байланысы жоқ.