Жәнібек Әлімханұлы допинг дауына ілікті: 7 желтоқсанда жекпе-жекке шықпауы мүмкін

Орта салмақта IBF және WBO белбеулерінің иегері Жәнібек Әлімханұлы VADA жүргізген тексеріс кезінде мелдоний препаратына қатысты «оң нәтиже» көрсеткен. Бұл туралы The Ring басылымы өз дереккөздеріне сүйеніп хабарлады.

Осы жағдайдан кейін Жәнібектің осы сенбіде кубалық Эрисланди Ларамен өткізуі тиіс болған үш белбеу сарапқа салынатын біріккен жекпе-жегі өтпеуі мүмкін. Жекпе-жек аптасы енді ғана басталғанда мұндай ақпараттың шығуы — айқастың тағдырын өте күмәнді етіп отыр.

Мелдоний — 2016 жылдан бері WADA тыйым салған дәрі. 2015 жылы жүргізілген ғылыми зерттеулерде оның

– спортшының төзімділігін арттырып,

– жаттығудан кейін қалпына келуді жақсартатыны,

– стресс кезінде ағзаны қорғайтыны,

– орталық жүйке жүйесінің жұмысын күшейтетіні анықталған.

The Ring мәліметінше, Әлімханұлы (17-0, 12 КО) қазіргі таңда орта салмақта осы басылымның рейтингіндегі №1 боксшы саналады. Ол соңғы жекпе-жегін 2025 жылғы 5 сәуірде Астанада өткізіп, Анануэль Нгамиссенгуді бесінші раундта тоқтату арқылы екі белбеуін қорғаған.

Ал WBA чемпионы Эрисланди Лара (31-3-3, 19 КО) The Ring рейтингіне белсенділік болмағандықтан уақытша енбей қалған. 42 жастағы Лара — қазіргі бокстағы ең жасы үлкен белбеу иесі. Ол соңғы рет 2024 жылдың қыркүйегінде Дэнни Гарсияны тоғызыншы раундта жеңгеннен кейін 15 ай үзіліске кеткен.

The Ring ақпаратына қарағанда, Лараның командасы алдағы күндері жекпе-жек тағдырына байланысты шешімді күтпей-ақ, өз белбеуін басқа қарсыласпен қорғау мүмкіндігін де қарастыруда.