Депутат ет өнімдеріне жүргізілетін тексерістердің әлсіз екенін айтты

Сенатор Бибігүл Жексенбай жануарлардан алынатын өнімдердің сапасы мен қауіпсіздігіне байланысты өзекті мәселелерді көтерді. Оның айтуынша, агросалаға инвестиция артып, өндіріс көлемі өсіп жатқанымен, мал шаруашылығы өнімдерінің қауіпсіздігі елдің азық-түлік жүйесіндегі ең осал тұс болып қалып отыр.

Сенатор ветеринариялық бақылаудың әлсіздігін, тексерістердің жүйесіздігін, зертханалардың жеткіліксіздігін, жем-шөпке арналған нақты нормативтердің жоқтығын атап өтті. Сондай-ақ импортталатын ет өнімдерінде өсу гормондары мен тыйым салынған қоспалардың болуы мүмкін екенін ескертіп, бұл халық денсаулығына тікелей қауіп төндіретінін айтты.

Жексенбайдың сөзінше, қазіргі мониторинг жүйесі антимикробтық резистенттіліктің өсуіне тосқауыл қоя алмай отыр, ал бұл – әлемдік деңгейдегі үлкен қауіп.

Оның айтуынша, дамыған елдерде мал өнімдерінің сапасы қатаң бақыланады:
– өсу гормондары мен профилактикалық антибиотиктерге тыйым салынады;
– зертханалар міндетті түрде аккредиттеледі;
– «мал азығы – өнім» қағидаты бойынша ашық бақылау жүргізіледі;
– таңбалау толық цифрландырылған.

Сенатор Қазақстанда да осы стандарттарға жақындау қажет екенін айтты. 

«Жоғарыда баяндалғандарды ескере отырып, ауыл шаруашылығы өнімдерінің сапасын қамтамасыз етуде стандарттарына барынша сәйкестендіру және жем-шөпке арналған нормативтерді жетілдіріп, мемлекеттік стандарттар мен техникалық регламенттерді енгізу керек. Өнімдердің сертификатталуы және зертханалық зерттеулерден өтуі бойынша ашық қолжетімділігі бар ұлттық деректер базасын құрып, мониторинг жүргізу керек. Халық денсаулығына зиян келтірген жағдайларда әкімшілік және қылмыстық жауапкершілікті күшейтіп, кластерлік шешімдер арқылы органикалық қоспалар өндірісін дамыту және антибиотиктер мен гормондардың қауіптері туралы халықты ақпараттандыру жөніндегі жалпыұлттық кампания жүргізу керек», - деді Бибигүл Жексенбай.

Бибігүл Жексенбай бұл өзгерістерді енгізу елдің азық-түлік қауіпсіздігін күшейтіп, халықты сапалы әрі қауіпсіз өніммен қамтамасыз ету үшін аса маңызды екенін атап өтті.