Балалардың қауіпсіздігі бірінші орында: Австралия онлайн әлемге жаңа заң енгізді

Австралия әлемде алғашқылардың бірі болып 16 жасқа толмаған балалардың әлеуметтік желілерде аккаунт ашуына тыйым салмақ. 10 желтоқсаннан бастап Meta, TikTok, Snapchat және YouTube сияқты платформалар балалардың тіркелуін болдырмау үшін «ақылға қонымды қадамдар» жасауға міндеттеледі, деп хабарлайды BBC

Коммуникациялар министрі Аника Уэллс технологиялық алпауыттардың қарсылығына қарамастан, үкіметтің бұл шешімнен бас тартпайтынын айтты. Оның сөзінше, зерттеулер әлеуметтік желілердің балаларға зиян келтіретінін дәлелдеген.

Министр бірнеше ел Австралия тәжірибесін қызығушылықпен бақылап отырғанын жеткізді. Ал АҚШ билігінің араласуы мүмкін болғанымен, Уэллс «біз австралиялықтар алдындағы міндетімізді атқарамыз» деп мәлімдеді.

Жаңа заң қоғамда қолдау тапқанымен, сарапшылар арасында сын да бар. Кейбіреулер тыйымнан гөрі бақылауды күшейту мен цифрлық сауаттылықты арттыру тиімді деп санайды. Сонымен қатар онлайн ойындардың (Roblox сияқты) бұл талаптан тыс қалуы да сынға себеп болды.

Үкімет тыйымды алдағы екі жылда қайта қарап, нәтижесіне қарай өзгерістер енгізуі мүмкін.