Астаналық блогер ерекше балалардың ата-аналарын қорлап, енді айыппұлын халықтан жинамақ

Астанада ерекше қажеттіліктері бар балалардың ата-аналарына қатысты бейәдеп пікір айтқан блогерге сот әкімшілік жаза тағайындады.

Әкімшілік құқық бұзушылықтар жөніндегі мамандандырылған ауданаралық соттың дерегінше, іс 2025 жылғы 2 желтоқсанда қаралған. О. есімді блогер Әкімшілік кодекстің 434-бабының 1-бөлігі («ұсақ бұзақылық») бойынша жауапқа тартылған.

Тергеу материалдарына сүйенсек, ол Instagram парақшасында мүмкіндігі шектеулі жандар мен олардың ата-аналарын қорлайтын бейнежазба жариялап, қоғамдық тәртіпті бұзған және құрметсіздік танытқан.

Сотта блогер бейәдеп сөз қолданғанын мойындаған, бірақ «балаларды қорламақ ниетім болған жоқ» деп түсініктеме берген.

Заң бойынша бұл бапта 20 айлық есептік көрсеткіш (78 640 теңге) көлемінде айыппұл, қоғамдық жұмысқа тарту немесе 5–15 тәулікке әкімшілік қамау жазасы көзделген. Алайда блогердің кәмелетке толмаған баласы бар болғандықтан, қамауға алу шарасы қолданылмаған.

Жеңілдететін мән-жайларды ескере отырып, сот О.-ға 78 640 теңге айыппұл салу туралы қаулы шығарды.

Полиция департаменті әлеуметтік желілерде жарияланатын кез келген материалдың қоғамдық санаға әсер ететінін және адамгершілік нормаларын бұзатын әрекеттерге жол берілмейтінін еске салды.

Айта кетейік, сот шешімі әлі заңды күшіне енген жоқ.

Ал осы уақытта блогер айыппұлды төлеу үшін ақша жинау науқанын бастағанын өзінің әлеуметтік желі парақшасында хабарлады.