Күріш, мақта, қызылша егістіктері не үшін қыстаратыны белгілі болды

Ауыл шаруашылығы вице-министрі Азат Сұлтанов келесі жылы елімізде күріш егілетін жер көлемі азаятынын хабарлады.

Qrnews тілшісінің «Күріш азая ма, су жеткілікті ме?» деген сауалына жауап берген вице-министр бұл шешім су тапшылығына және егістік құрылымын оңтайландыруға байланысты қабылданып отырғанын айтты.

«Біз вегетациялық кезеңді аяқтадық. Қызылорда облысында жоспарланған көлемде күріш жиналды. Келесі жылы күріш алқаптарын азайту жоспарланып отыр. Биыл бұл көрсеткіш 80 мың гектар болса, келесі жылы 78 мың гектарға қысқартамыз», – деді Сұлтанов.

Оның айтуынша, жаңа жоспар ғылыми институттармен бірлесіп дайындалған, ал күріш егілетін аумақ азайғанымен, ішкі нарықты қамтамасыз етуге мүмкіндік бар.

«Күріш алқабының азаюы өнім тапшылығына әкелмейді.», – деді ол.

Сонымен қатар вице-министр Премьер-Министрдің орынбасары Қанат Бозымбаев, Ауыл шаруашылығы және Су ресурстары министрлері бастаған делегацияның Қызылорда, Тараз және Түркістан облыстарына жұмыс сапарымен баратынын хабарлады.

«Бұл сапарда күріш қана емес, мақта және қант қызылшасы сияқты суды көп қажет ететін дақылдардың көлемін азайту мәселесі де қаралады», – деді Азат Сұлтанов.

Министрлік өкілінің мәлімдеуінше, бұл шаралар мемлекет тапсырмасына сай су үнемдеу саясатын күшейтуге бағытталған.