Кремльдегі келіссөз бес сағатқа созылды: Ресей мен АҚШ ортақ шешімге келе алмады

Кремльде Ресей мен АҚШ делегациялары Украинадағы соғысты бейбіт жолмен реттеу мәселесін талқылады, деп хабарлады ресейлік ақпарат агенттіктері. Келіссөз 3 желтоқсанға қараған түні аяқталып, шамамен бес сағатқа созылған.

Ресей тарапынан кездесуге президент Владимир Путин, оның көмекшісі Юрий Ушаков және арнайы өкіл Кирилл Дмитриев қатысты. АҚШ делегациясын президенттің арнайы өкілі Стивен Уиткофф және Дональд Трамптың күйеу баласы Джаред Кушнер басқарды.

Путиннің көмекшісі Юрий Ушаковтың айтуынша, кездесуде Украинадағы соғысты тоқтату бойынша бірнеше нұсқа талқыланған, алайда әзірге ортақ келісімге келу мүмкін болмаған.

«Компромистік нұсқа әзірге табылған жоқ. Дегенмен АҚШ ұсынған кейбір идея талқылауға тұрарлық. Ал кейбір тұсы бізге мүлде сай келмейді. Жұмыс жалғасады», – деді Ушаков.

Оның сөзінше, Путин Вашингтонның кей ұсынысына сын көзбен қараған, әсіресе аумақтық мәселелер бойынша келіспеушіліктер байқалған.

Соған қарамастан, Ушаков келіссөзді «пайдалы әрі мазмұнды» деп бағалады.

Келіссөз жабық форматта өткен. Тараптар мәліметті жария етпеуге келіскен. Америкалық делегация нәтижелер туралы тікелей Дональд Трампқа баяндап, содан кейін Мәскеумен телефон арқылы байланыс орнатпақ.

Ал дәл осы уақытта Украина президенті Владимир Зеленский Telegram желісінде «жеңіл шешімдер күтпейтінін» жазды. Оның айтуынша, Киев АҚШ делегациясының Мәскеудегі кездесуінен кейінгі сигналдарын күтіп отыр.

«АҚШ өкілдері кездесуден кейін бірден бізге хабарласпақ. Сол хабарлар біздің келесі қадамымызды айқындайды», – деді Зеленский.

Ол алдағы уақытта АҚШ делегациясымен және Дональд Трамппен жеке кездесуі мүмкін екенін де жоққа шығармады.