СҚО-да аудиттен кейін әкімдер мен шенеуніктер жауапқа тартылды

Солтүстік Қазақстан облысы әкімдігі мен аудандық және қалалық әкімдіктердің бірқатар лауазымды тұлғасы Жоғары аудиторлық палата жүргізген тексерістен кейін жауапқа тартылды.

Биыл қазан айында Жоғары аудиторлық палата Солтүстік Қазақстан облысына бөлінген бюджет қаражаты мен мемлекеттік активтердің тиімді пайдаланылуын тексерген. Нәтижесінде заң бұзушылықтар, бюджет нормалары мен ішкі регламент талаптарын орындамау деректері анықталған.

Осыған байланысты өңір әкіміне, сондай-ақ Петропавл және Сергеевка қалаларының, Айыртау, Уәлиханов, Ақжар және Тайынша аудандарының әкімдеріне бұзушылықтарға жол берген тұлғаларды жауапқа тарту тапсырылған.

Тексеру қорытындысы бойынша мына лауазымды тұлғаларға шара қолданылды:

• Айыртау ауданының әкімі;

• Петропавл және Сергеевка қаласы әкімдерінің орынбасарлары;

• облыстық Құрылыс, сәулет және қала құрылысы басқармасы басшысының орынбасары;

• Денсаулық сақтау басқармасы басшысының орынбасары;

• Жолаушылар көлігі және автомобиль жолдары басқармасы басшысының орынбасары;

• Петропавл қаласы әкімдігінің құрылыс және сәулет бөлімінің сектор меңгерушісі;

• Тайынша, Айыртау, Уәлиханов және Ақжар аудандары әкімдіктерінің бөлім басшылары мен сектор меңгерушілері.

Сонымен қатар Жоғары аудиторлық палата өңірде анықталған бұзушылықтарды жою жөніндегі арнайы іс-шаралар жоспарын әзірлеуді тапсырды. Жоспарда облыстық маңызы бар автомобиль жолдарын паспорттау міндеті де бар.

Палата аудит қорытындысы бойынша берілген барлық тапсырмалардың орындалуын қатаң бақылауда ұстайтынын мәлімдеді.