Трамп Венесуэлаға шабуыл жасауды бұйырды: не боп қалды?

АҚШ президенті Дональд Трамп Венесуэлаға қарсы құрлықтағы әскери операция бастауға дайындық жүріп жатқанын мәлімдеді. Бұл туралы ол 2 желтоқсан күні Ақ үйдегі үкімет отырысында айтты.

«Біз енді тек теңізден емес, құрлықтан да соққы береміз. Бұл әлдеқайда оңай. Олардың қандай жолдарды пайдаланатынын, қайда тұратынын, бәрін білеміз. Жақында бастаймыз», – деді Трамп.

Соңғы бірнеше аптада Вашингтонның Венесуэлаға қарсы әскери кампания бастауы мүмкін екені туралы ақпарат тараған. АҚШ әскери кемелері біраз уақыттан бері Венесуэла аумақтық суларына жақын маңда орналасқан.
Ресми түсіндіру бойынша, бұл әрекеттер есірткі картельдеріне қарсы күрес және АҚШ-қа есірткі жеткізілуінің алдын алу мақсатында жасалып жатыр.

«Кім есірткі саудасына қатысса және оны біздің елде сатса, бәрі соққыға ұшырайды», – деді Трамп.

29 қараша күні Трамп Венесуэла әуе кеңістігінің толық жабылғанын жариялаған, бірақ егжей-тегжейін түсіндірмеген.

Бұған дейін, 21 қарашада, бірнеше айға созылған қысымнан кейін Трамп пен Венесуэла президенті Николас Мадуро 15 минут телефонмен сөйлескен. Онда АҚШ президенті Мадуроға бір апта ішінде елден кетіп, отбасымен қалаған еліне бару жөнінде ультиматум қойған.

Ақпарат көздерінің хабарлауынша, Мадуро белгілі бір шарттар орындалса, яғни өзіне және жақындарына толық құқықтық амнистия берілсе, елден кетуге келіскен. Алайда Трамп бұл талаптардың көпшілігін қабылдамай, оған қашу үшін бір апта уақыт берген.

Ультиматум мерзімі 28 қарашада аяқталған, бірақ Мадуро елін тастап кетпей, билікте қалуды жалғастырып келеді.

Тамыз айында АҚШ Мадуроны ұстауға көмектесетін ақпарат үшін 50 миллион доллар сыйақы тағайындаған еді. Трамп Венесуэла президентін заңсыз сайланған басшы деп есептейді және сайлау нәтижесін бұрмаланған деп санайды.

АҚШ-тың әскери қысымы күшейген тұста Мадуро Ресей, Қытай және Иранды Венесуэланың қорғанысын нығайтуға шақырған.

БАҚ мәліметінше, Мадуро Владимир Путинге жолдаған хатында әуе шабуылына қарсы қорғаныс жүйесін жетілдіруге, Су-30 ұшақтарын жөндеуге және радарлар мен зымырандар жеткізуге көмек сұраған.

Осыған дейін, 22 қазан күні, Ресей Венесуэламен стратегиялық ынтымақтастық туралы келісімді ратификациялаған.

Ресей Сыртқы істер министрлігінің өкілі Мария Захарова бұл шешімге түсініктеме беріп, Мәскеу Каракаспен тығыз байланысын сақтап, «қолда бар және ықтимал қауіптерге жауап беруді жалғастыратынын» айтқан.