Неліктен Еуропа қалалары үлкен көліктерден бас тарта бастады?

Еуропа қалаларында көліктердің көлемі мен салмағының артуына байланысты  «carspreading» деп аталатын жаңа үрдіс пайда болды. SUV және ірі көліктердің танымалдығы өскенімен, бірқатар қала оларды шектеу шараларын қолға алып жатыр, деп хабарлады BBC.

Парижде ауыр көліктерге тұрақ бағасы үш есе қымбаттады

Париж әкімдігі 2024 жылдың қазанында салмағы ауыр машиналар үшін тұрақ ақысын үш есе көтерді. Қала орталығында бір сағаттық тұрақ бағасы 6 еуродан 18 еуроға, ал алты сағаттық бағасы 75 еуродан 225 еуроға дейін өсті.

Мэр Энн Идальго бұл шешім ауа ластануын азайтып, экологиялық жағдайды жақсартуға бағытталғанын мәлімдеді. Әкімдік дерегінше, бірнеше ай ішінде қала көшелерінде тоқтайтын ауыр көліктер саны үштен екіге азайған.

Ұлыбритания да шектеу қоюда

Париж тәжірибесінен кейін Ұлыбританияның бірнеше қаласы да ірі көліктерге қатысты қадамдар жасауда.

Кардифф қаласы салмағы 2400 килограмнан асатын көліктерге тұрақ рұқсаттамасының құнын арттыру жайлы шешім қабылдады. Қала кеңесі ауыр машиналардың:

* көбірек зиянды шығарындылар тарататынын,

* жолды тез бүлдіретінін,

* жол-көлік оқиғасы кезіндегі қауіп деңгейін арттыратынын атап өтті.

Сарапшылардың мәліметінше, Еуропада SUV үлесі соңғы онжылдықта айтарлықтай өскен. 2011 жылы олардың нарықтағы үлесі 13 пайыз болса, 2025 жылы 59 пайызға жеткен.

Қалалардағы басты проблема – орын тапшылығы

Көліктердің көлемінің ұлғаюы қалалық ортаға айтарлықтай қысым түсіруде. Ұлыбританиядағы ең танымал 100 модельдің басым бөлігі көшедегі стандартты тұрақ еніне сыймайды. Сарапшылардың айтуынша, тар көшелер мен шектеулі тұрақ орындары ірі көліктердің қала өміріне бейім еместігін көрсетеді.