Тоқаев әскерилердің жарақат алуы мен қаза табуына жол бермеуді тапсырды

Мемлекет басшысы Қасым-Жомарт Тоқаевтың төрағалығымен Қарулы Күштердегі және өзге де әскери құрылымдардағы әскери және құқықтық тәртіп мәселелері талқыланған кеңес өтті. Бұл жөнінде Ақорда хабарлады.

Жиында Бас прокурор Берік Асылов, Ішкі істер министрі Ержан Сәденов және Қорғаныс министрі Дәурен Қосанов баяндама жасап, әскерилер арасында тәртіп пен тәрбие жұмысын күшейту, сондай-ақ құқық бұзушылықтардың алдын алу бағытындағы шаралар туралы есеп берді.

Кеңес барысында Қарулы Күштер мен құқық қорғау органдарының қызметіндегі бірқатар өзекті мәселе қаралды. Атап айтқанда, жеке құрам арасында қаза болу мен жарақат алу жағдайларын азайту, тәрбие және идеологиялық жұмыстың тиімділігін арттыру, заң мен тәртіпті сақтау тетіктерін жетілдіру жөніндегі ұсыныстар талқыланды.

Президент Тоқаев құқықтық тәртіпті нығайту – мемлекеттің қорғаныс қабілетінің ажырамас бөлігі екенін атап өтіп, бұл бағыттағы жұмысты жүйелі түрде жалғастыруды тапсырды.

Мемлекет басшысы сондай-ақ әскердегі құқық бұзушылықтардың алдын алуға, тәртіп пен моральдық жауапкершілікті арттыруға, тәрбие жұмысының сапасын күшейтуге бағытталған нақты міндеттер жүктеді.