Жол салуда қолданып жатқан “жылы асфальт” деген не?

Қазақстандық ғалымдар жыл сайын қысқа мерзімге созылатын жол-құрылыс маусымын ұзарта алатын жаңа технологияны сынақтан өткізіп жатыр. «Жылы асфальт» деп аталатын әдіс арқылы ауа температурасы -10 градусқа дейін төмендесе де жол салуға мүмкіндік туады, деп хабарлады 24.kz.

Қазір елде жол салу жұмыстары негізінен мамырдан қазанның соңына дейін ғана жүргізіледі. Солтүстік өңірлерде бұл мерзім тіпті қысқа, себебі қар ерте түседі. Ал барынша тиімді әрі үздіксіз жұмыс істеу үшін ғалымдар жаңа тәсіл ұсынған.

«Қазақстан жол ғылыми-зерттеу институты» АҚ ресми өкілі Адина Айнаеваның айтуынша, жаңа технологияның басты ерекшелігі – асфальттың температурасын 150 градустан 90–100 градусқа дейін төмендету.

«Біздің мақсат – минус 10 градусқа дейін жол салуға мүмкіндік беру. Қазір асфальт-бетон қоспасын жылы күйде ұзақ уақыт қатпай ұстап тұратын арнайы қоспа зерттеліп жатыр. Егер сынақ сәтті өтсе, бұл жол құрылысына кететін логистикалық шығындарды азайтып, маусым мерзімін айтарлықтай ұзартады», – деді Айнаева.

Маманның сөзінше, қазіргі әдіспен жолға төселетін асфальт зауыттан шыққан соң тез суып қалады. Ал «жылы асфальт» технологиясы арқасында материалды алыстағы аймақтарға да жеткізіп, сапасын жоғалтпай қолдануға болады.

Зертханалық сынақтар кезінде жаңа қоспаның төзімділігі мен серпімділігі тексеріліп жатыр. Инженер Темірлан Жеңісов жол сапасын тексеру тәртібі өзгермейтінін айтты.

«Біз әрбір 300 метр сайын үш сынама аламыз. Нәтижесін зертханалық талдаудан өткізіп, тапсырыс берушіге жолдаймыз. Егер жол сапасы талапқа сай болмаса, оны қабылдамайды», – деді ол.

Мамандардың айтуынша, «жылы асфальт» технологиясы солтүстік аймақтарда да қыс ортасында жол жөндеуге мүмкіндік беріп, елдегі инфрақұрылымның сапасын арттыра түспек.

Ғылыми зерттеу нәтижелері оң болса, жаңа технология жақын жылдары республикалық және жергілікті маңыздағы жол құрылыстарында қолданыла бастайды.