Қазақстандық ерлі-зайыпты Сиднейдегі казинода алаяқтық жолмен 1 млн доллар ұтқан – The Guardian

Австралияның Сидней қаласында Қазақстан азаматтары – 36 жастағы Дилноза Исмаилова мен 44 жастағы Алишерходжа Исмаилов жасырын камера мен құлаққаптарды пайдаланып, жергілікті Crown казиносын алдап, 1,18 миллион австралиялық доллар (шамамен 370 миллион теңге) ұтқан деген күдікпен ұсталды. Бұл жөнінде The Guardian хабарлады.

Тергеу деректеріне сәйкес, ерлі-зайыпты Сиднейге қазан айында ұшып келіп, сол күні-ақ казиноға мүше ретінде тіркелген. Келесі екі ай бойы олар тұрақты түрде ойынға қатысып, үлкен сомадағы ұтыстарымен қауіпсіздік қызметінің назарын аудартқан.

Күдіктілердің соңғы ойындарының бірінде Дилноза Исмаилова Микки Маус бейнесі бар жейде киіп келген. Тергеушілердің мәліметінше, дәл сол белгіге ұсақ бейнекамера орнатылған. Ойын үстінде күзет қызметі оның күмәнді әрекетін байқап, полиция шақырған. Ерлі-зайыптыны сол сәтте казино залында ұстап, тергеу басталған.

Полиция олардың телефондары мен арнайы жасырын құрылғыларын, соның ішінде шағын камералар, магнитті жабдықтар, батареялар және айна түріндегі бейне жазу құралдарын тәркілеген. Ал Сиднейдің Кент-стрит көшесіндегі пәтерлерінен ойын карталары, зергерлік бұйымдар және 2000 еуро табылған.

Тергеу нұсқасына сай, жейдедегі камера ойын үстеліндегі карталарды түсіріп, бейнені смартфонға жіберіп отырған. Ал бейнені сырттағы серіктесі қарап, ерлі-зайыптыға құлаққап арқылы қандай ставка жасау керектігін айтып отырған. Осылайша, олар бірнеше апта ішінде 1,18 миллион доллар ұтқан.

Қазір екі күдікті де қамауда. Олар кепілмен босатуды сұрамаған. Дилноза Исмаилованың ісі бойынша келесі сот отырысы ақпан айында, ал Алишерходжа Исмаиловтың ісі 11 желтоқсанда өтеді.

Австралияның ұйымдасқан қылмыспен күрес департаментінің басшысы Питер Фокс бұл оқиғаға қатысты пікір білдірді.

«Біз казино күзет қызметімен тығыз жұмыс істейміз. Сол себепті осындай алаяқтық схемаларды дер кезінде анықтап, тоқтатуға мүмкіндік бар», – деп мәлімдеді ол.