Қызылорда облысынан халық үдере көшіп жатыр

Қызылорда облысының халқы жаппай көшіп жатыр, деп хабарлайды Qrnews тілшісі inbusiness.kz-ке сілтеме жасап.

2024 жылдың I тоқсандағы қорытындысы бойынша, облыста 843,4 мың адам қалған. Мұндай деректі Ұлттық статистика бюросы келтірді. Бюро мәліметінше, Қызылорда облысында көші-қонның теріс айырмасы қалыптасқан.

"2024 жылғы қаңтар-наурыз айларында өңірден қоныс аударғандар саны көшіп келгендерден 2 216 адамға асып түсті, салыстырғанда, 2023 жылғы қаңтар-наурызда бұл көрсеткіш 924 адамды құраған еді", – деп хабарлады Ұлттық статбюро.

Өңірде бала туу көрсеткіші де азайып, өлім-жітім көбейген. 2024 жылғы қаңтар-наурызда облыста 4 772 сәби ғана дүние есігін ашқан, бұл 2023 жылғы қаңтар-наурыздағыдан 2,2% кем. Ал биылғы үш айда 1 102 қызылордалық қайтыс болған, бұл 2023 жылғы қаңтар-наурыздағыдан 1,4%-ға көп.

Биыл шағын және орта кәсіпорындар да былтырғыдан азырақ ашылған.

"Тіркелген заңды тұлғалар саны 2024 жылғы 1 мамырдағы жағдай бойынша 10 581 бірлікті құрап, өткен жылғы сәйкес кезеңдегіден 2,7% азайды, оның өзінде басым көпшілігі немесе 10 222 бірлігі – 100 адамнан аз қызметкері бар ұсақ компаниялар. Облыста тіркелген шағын және орта кәсіпорын саны 7 922 бірлікті құрап, былтырғыдан 3,1% азайды. 2024 жылғы қаңтар-наурызда еуразиялық одақ елдерімен өзара саудасы 25 млн долларды құрап, 2023 жылдың қаңтар-наурызымен салыстырғанда 7,2% азайды", – деп мәлім етті Ұлттық статбюро.

Есесіне, облыста инфляция шарықтап тұр. Ресми статистика бойынша Қызылорда облысында тұтыну бағасының индексі 2024 жылғы қаңтар-мамыр аралығында 108 пайызға жеткен. Өңірде медициналық қызметтер – 114,1%, қонақүйлер – 113,5%, киім және аяқкиім – 112%, ақылы қызметтер – 110,6%, демалыс және мәдениет қызметтері – 110,4%, тұрғын үй қызметтері, су, электр энергиясы, газ және отынның басқа да түрлерінің бағасы – 110,2%-ға жеткен.

Сондай-ақ  2024 жылғы мамырда Қызылорда облысының аудандары мен қалаларында ең төмен күнкөріс деңгейі небәрі 44 121 теңге болды. 

Сарапшылар қазыналы облыс тұрғындарының кедей болатын жөні жоқ дейді. Алайда тіпті сол қазба байлықты зерттеуге, геологиялық барлауға , инвестиция тартуға баса мән берілмей келеді.

Қызылордалық Мәжіліс депутаты Мархабат Жайымбетовтің айтуынша, аймақта өткен ғасырдың 40–60-шы жылдарынан бері пайдалы қазбаларға ауқымды геологиялық зерттеулер мен барлау жұмыстары жүргізілмеген. Көршілес Қарағанды облысында қатты пайдалы қазбалардың 109 кен орны игерілсе, Қызылорда облысында тек 2-ақ кен орны жұмыс жасап тұр.

Қызылорда облысында перспективалы учаскелерге зерттеулер жүргізу жағы кемшін екенін Премьер-министрдің бірінші орынбасары Роман Скляр да жоққа шығармады. Бұл іске салынып жатқан қаражат ауқымы да мардымсыз, бірер миллион доллардан аспайды.

Қызылорда облысының әкімдігі экономикалық даму көрсеткіштерінің кері кеткенін өңірде мұнайдың таусылып қалғанымен түсіндіреді. Ал Үкімет басшысының бірінші орынбасары облыста басқа да байлық тұнып жатқанын алға тартады.

Қызылорда облысының жер қойнауы мұнайдан бөлек, уран, алтын, темір, қорғасын, ванадий, әк, тұз, кварц құмы, доломит, саздақ, тағы басқа қатты және кең таралған пайдалы қазбаларға бай. Алайда өңір басшылығы қойнауы қазынаға толы жердің ен байлығын ел игілігіне жарата алмай тұр.

Сондықтан да өздері үшін де, ұрпағының болашағы үшін де тірек таппаған қызылордалықтар облыстан үдере көшіп жатыр.