Кімдерге мемлекеттік қордан тұрғын үй алуға басымдық беріледі?

Сенат тұрғын үй саясатын реформалау мәселелері бойынша өзгерістер енгізілген заң жобасын Мәжіліске кері қайтарды. Заңды қарау барысында сенаторлар мемлекеттік тұрғын үй қорынан баспана алуға кезекте тұрған "алғашқы кезектегі" азаматтардың тізімін жаңартты. Бұрын бұл тізімге ҰОС ардагерлері, жетім балалар, көпбалалы отбасылар, 1 және 2 топтағы мүгедектер мен мүгедек балалары бар отбасылар ғана кірген болатын.

Енді бұл санатқа келесі топтар қосылды:

- ҰОС ардагерлеріне теңестірілген азаматтар;
- басқа мемлекеттердің аумағындағы ұрыс қимылдарына қатысқан ардагерлер;
- жесірлер.

Осы азаматтарға берілетін мемлекеттік пәтерлердің жалпы санының кемінде 70%-ы бөлінуі ұсынылды. Сонымен қатар жалғыз апатты тұрғын үйі бар азаматтарды басқа пәтер алмағанша, сол үйлерінен айырмау туралы ұсыныс жасалды. Бұл пәтерлерді кейіннен жекешелендіру құқығы сақталады.

Сенатта Астана қаласының ғимараттарының сыртқы қабырғаларын жөндеу мен фасадтарын ретке келтіру жұмыстарын тұрғындардың есебінен емес, жергілікті бюджеттің қаражатынан (қаржы бар болған жағдайда) жүргізу туралы түзетулер енгізілді. Бұл қалаға бірыңғай архитектуралық стиль беру үшін қажет.

Сондай-ақ, заңға сәйкес, азаматтар мемлекеттен жаңа баспана алса, ескі апатты үйді өз меншігінде сақтап қалу құқығынан айырылады. Тұрғын үй жағдайын жақсартуға бағытталған мемлекеттік қолдау шараларын алуда басым құқықтарды алып тастауға қатысты өзгерістер енгізілді.

Заң қабылданған жағдайда азаматтар бұрын сатып алу құқығынсыз жалға берілген тұрғын үйлерді жекешелендіре алады. 2017 жылдан бері "Нұрлы жер" бағдарламасы аясында осындай механизм арқылы өңірлерде 51 мың пәтер берілген болатын.

Сонымен қатар қызметтік немесе қоғамдық міндеттерін орындау кезінде, әскери қызметте, адам өмірін құтқару немесе құқық қорғау кезінде қаза тапқан азаматтардың отбасыларына бір жыл ішінде баспана берілуі міндеттеледі.

Заң қабылданғаннан кейін "Отбасы банк" тұрғын үй есебін жүргізіп, оны үлестірумен айналысатын ұлттық даму институтына айналады. Сондай-ақ Қазақстанда баспанаға мұқтаж азаматтарды есепке алу үшін "Тұрғын үймен қамтамасыз ету орталығы" атты электрондық база құрылады. Бұған қоса, мемлекеттік тұрғын үй қорынан баспана алып, оны жекешелендірген азаматтарды тұрғын үй кезегіне қоюдан бас тарту нормасы енгізіледі.