Шымкентте халықаралық деңгейдегі заманауи ғылыми хаб бой көтермек

Өзбекәлі Жәнібеков атындағы Оңтүстік Қазақстан педагогикалық университетінің өкілдері Түркияға арнайы сапармен барып, халықаралық білім беру мен ғылым саласында елеулі бетбұрыс жасады. Ректор Қайрат Балабиев бастаған қазақстандық делегация Анкарадағы беделді жоғары оқу орындарының басшыларымен кездесіп, ауқымды жобаларды талқылады.

Атап айтқанда, Гази университетінің ректоры, профессор Угур Уналмен өткен келіссөз барысында Шымкентте орналасқан Гази университеті филиалының жұмысын халықаралық стандарттарға сай жандандыру жайы сөз болды. Тараптар ғылыми-зерттеу әлеуетін біріктіріп, ортақ жобаларды жүзеге асыруға және докторанттар мен жас ғалымдарды даярлауға уағдаласты.

Сапардың ең қызықты бөлігі - қазақстандық өкілдердің Гази, Анкара және Таяу Шығыс техникалық университеттеріне ортақ «NÖROM» нейроғылым және нейротехнология орталығының жұмысымен танысуы. Ең озық зертханалар мен ғылыми кооперация тәжірибесі зерттеліп, нәтижесінде бұл үлгі Оңтүстік Қазақстан педагогикалық университеті базасында заманауи ғылыми-зерттеу хабын құруға негіз болмақ. Бұл бастама екі ел ғалымдарының күшін біріктіріп, отандық ғылымды мүлдем жаңа деңгейге көтеруге жол ашады.