Ұлттық банк зейнетақы қорындағы ақшаны сақтаудың жаңа жолын ұсынды

Қазақстандықтардың зейнетақы жинақтарын инвестициялау тәсілі жақын арада мүлде басқаша сипат алмақ. Ұлттық банк енді барлық салымшының қаржысын бірдей стратегиямен басқарудан бас тартып, «жас ерекшелігіне байланысты портфельдер» моделін енгізуді жоспарлап отыр.

Бұл туралы Қаржы нарығын реттеу және дамыту агенттігі төрағасының орынбасары Нұрлан Тұрсынханов ҚР Капитал нарығын 2030 жылға дейін дамыту бағдарламасын талқылау кезінде мәлімдеді.

Жаңа реформаның негізгі мәні – салымшының жас шамасына қарай инвестициялық тәуекелдерді бөлу:

 Жас салымшылар үшін: Қаржының басым бөлігі табысы жоғары, бірақ тәуекелі бар акциялар мен өсу құралдарына бағытталады.

 Зейнетке жақындағандар үшін: Ақтифтер біртіндеп тәуекелі төмен, сенімді әрі ликвидті қаржылық құралдарға ауыстырылады.

Мұндай модельді қазірдің өзінде кейбір жеке басқарушы компаниялар қолданып келеді. Дегенмен олардың көбі әлі де барлығына ортақ консервативті тәсілді таңдап отыр.

Бұл бастама Бірыңғай жинақтаушы зейнетақы қоры (БЖЗҚ) активтерін басқару тиімділігін арттыруды, оларды капитал нарығын қаржыландыруға белсенді тартуды және ұзақ мерзімді бағалы қағаздарға ішкі сұранысты қалыптастыруды көздейді.

Сондай-ақ, өзгерістер Ұлттық банктің қазіргі төмен кірістілігі аясында дайындалып жатыр. Есеп бойынша, 2026 жылдың басынан 1 тамызға дейін Ұлттық банк басқаруындағы активтердің кірістілігі бар-жоғы 4,4% құрады. Ал жеке басқарушы компаниялардың басым бөлігі дәл осы кезеңде бұдан әлдеқайда жоғары номиналды кірістілік көрсеткен.