АҚШ пен Иран қайта соққы алмасты

АҚШ Иран аумағына жаңа соққылар жасады. Бұған жауап ретінде Иран Ирак пен Иорданиядағы америкалық әскери нысандарға зымырандар мен ұшқышсыз ұшу аппараттарын ұшырғанын мәлімдеді.

АҚШ Орталық қолбасшылығының хабарлауынша, соққылар Иран Ислам революциясы сақшылар корпусының Ормуз бұғазындағы азаматтық кемелерге және өңірде орналасқан америкалық әскерилерге шабуыл жасау әрекеттерінен кейін басталған.

Иранның Қызыл Жарты Ай қоғамы АҚШ-тың зымыран соққысынан төрт адам, оның ішінде бір бала қаза тапқанын хабарлады. Сынықтар Иранның оңтүстігіндегі Сирик қаласындағы тұрғын үйге түскен. Ол кезде үйде үйлену тойы өтіп жатқан.

АҚШ президенті Дональд Трамп Вашингтонның соққылары Иранның Ормуз бұғазына жаңа миналар қоюға және Иорданиядағы америкалық базаға сегіз зымыран ұшыруға әрекеттенуіне жауап болғанын мәлімдеді. Оның сөзінше, екі әрекет те сәтсіз аяқталған.

Трамп Иран тағы да жауап соққысын жасаса, АҚШ бұдан да қуатты шабуылдар ұйымдастыратынын ескертті.

Иран Ислам революциясы сақшылар корпусы АҚШ бұл әрекетіне өкінетінін мәлімдеді. Иран ақпарат құралдары өңірдегі америкалық базаларға жауап ретінде зымырандар мен ұшқышсыз ұшу аппараттары ұшырыла бастағанын хабарлады.

Иранның жергілікті билігінің мәліметінше, АҚШ Оман шығанағы жағалауындағы Чабахар және Конарак порттары маңына төрт зымыранмен соққы жасаған.

Осы аптаның басында АҚШ шілдеден бері алғаш рет Ирандағы нысандарға шабуыл жасап, Ормуз бұғазындағы Ларак аралында орналасқан екі зымыран қондырғысын атқылаған еді. Иран бұған Иорданиядағы әскери әуе базаларына зымыран ұшырып, Біріккен Араб Әмірліктеріне бір ұшқышсыз ұшу аппаратын бағыттаған.