Семей орманындағы экологиялық саяхат балаларға ұмытылмас әсер сыйлады

Семей қаласының Арнаулы әлеуметтік қызметтерге мұқтаж балаларды қолдау орталығының тәрбиеленушілері үшін «Семей орманы» мемлекеттік орман табиғи резерватында танымдық экологиялық экскурсия ұйымдастырылды. Шара барысында балалар орманда өзін-өзі ұстау, табиғи ортаны қорғау және қауіпсіздік талаптарын сақтау бойынша маңызды ережелермен танысты, деп хабарлайды Абай облысы әкімдігінің баспасөз қызметі.

Бұл бастама «Таза Қазақстан» экологиялық бағдарламасын жүзеге асыру аясында тұрақты түрде өткізіліп келеді. Іс-шараның басты мақсаты – өсіп келе жатқан ұрпақтың табиғатқа деген сүйіспеншілігін арттыру, қоршаған ортаны сақтаудың маңыздылығын түсіндіру және ерекше қорғалатын аумақтағы қауіпсіздік талаптарын үйрету.

Іс-шара резерваттың Павлодар тас жолы бойында орналасқан Қызыл кордон орман шаруашылығы аумағында өтті. Жетекшілік еткен мамандар балаларға орман экожүйесі, онда өсетін өсімдіктер мен мекендейтін жануарлар дүниесі туралы толық ақпарат берді. Сонымен бірге, ерекше қорғалатын табиғи аумақта өрт қауіпсіздігі ережелерін қатаң сақтау, от жақпау, қоқыс тастамау және табиғи тепе-теңдікті бұзбау қажеттігі ескертілді.

«Орман алқабы үлкен болғандықтан, мемлекеттік деңгейде қорғалады. Сондықтан бұл аумақта бейсауат жүруге болмайды. Ең алдымен, келушілер қауіпсіздік ережелерін мұқият сақтауы қажет. От жағуға тыйым салынады. Сондай-ақ қоқыс тастап, табиғатқа зиян келтіруге болмайды. Біз тәрбиеленушілерге осы мәселелер бойынша қажетті бағыт-бағдар бердік», – деді «Семей орманы» МОТР Қызыл кордон орман шаруашылығының басшысы Қуаныш Қайырханов.

Экскурсия барысында тәрбиеленушілер табиғатты бақылап, өздерін қызықтырған сұрақтарына мамандардан жауап алды. Шара соңында балалар таза ауада серуендеп, алған білімдері бойынша оң әсерлерін бөлісті.

«Таза Қазақстан» акциясы шеңберіндегі мұндай танымдық кездесулер балалардың бос уақытын тиімді ұйымдастыруға, экологиялық мәдениетті қалыптастыруға және табиғатқа жанашырлықпен қарау құндылықтарын сіңіруге бағытталған.