Жаслан Мәдиев жасанды интеллект және цифрлық даму министрі болып қайта тағайындалды

Президент Қасым-Жомарт Тоқаевтың жарлығымен Жаслан Мәдиев Премьер-Министрдің орынбасары – Жасанды интеллект және цифрлық даму министрі болып тағайындалды.

Бұған дейін оның кандидатурасын Құрылтайдың Цифрландыру, инновациялар және ғылым комитеті мақұлдаған.

Жаслан Мәдиев 1983 жылы Алматыда дүниеге келген. Әл-Фараби атындағы Қазақ ұлттық университетін, Колумбия университетін және Массачусетс технологиялық институтын тәмамдаған.

Еңбек жолын 2007 жылы Лондондағы Morgan Stanley инвестициялық банкінде бастаған. Әр жылдары Президент әкімшілігінің Стратегиялық әзірлемелер және талдау орталығында сарапшы, «Самұрық-Қазына» қорының қазынашылық департаментінің директоры, Kazyna Capital Management және Қазақстанның Даму банкі басқарма төрағасының орынбасары, Ұлттық банкте басшылық қызметтер атқарған. Сондай-ақ Премьер-Министрдің кеңесшісі болған.

Бұдан бөлек, Стратегиялық жоспарлау және реформалар агенттігі төрағасының орынбасары, Цифрлық даму, инновациялар және аэроғарыш өнеркәсібінің бірінші вице-министрі және Binance Kazakhstan бас директоры қызметтерін атқарған.

2024 жылғы мамырда Цифрлық даму, инновациялар және аэроғарыш өнеркәсібі министрі болып тағайындалды. Ал 2025 жылғы қыркүйектен бастап Премьер-Министрдің орынбасары – Жасанды интеллект және цифрлық даму министрі қызметін атқарды.