Пәтер жалдау қымбаттады: Алматы мен Астанада баға қанша?

Қазақстанда тамыз айында пәтер жалдау ақысы айтарлықтай өсті. Krisha.kz мәліметінше, бір бөлмелі пәтерлердің жалдау бағасы орта есеппен 11%-ға, екі бөлмелі пәтерлер 13%-ға, үш бөлмелі баспана 10%-ға қымбаттаған.

Екі бөлмелі пәтерлердің жалдау ақысы зерттеуге енген 19 қаланың бәрінде өскен. Ең жоғары өсім Қарағандыда тіркеліп, баға 26%-ға өсіп, 230 мың теңгеге жетті. Қостанай мен Павлодарда 25%-ға өсіп, 250 мың теңге, Оралда 20%-ға өсіп, 180 мың теңге болды.

Алматы мен Астанада екі бөлмелі пәтерлер бір айда 16,7%-ға қымбаттап, екі қалада да 350 мың теңгеге жетті.

Бір бөлмелі пәтер жалдау құны бойынша Астана көш бастап тұр. Елордада мұндай баспана айына 250 мың теңге, Алматыда 230 мың теңге тұрады.

Үш бөлмелі пәтерлер бойынша Алматы Астананы қуып жетті. Шілде соңында екі қала арасындағы айырма 100 мың теңге болған. Қазір екі мегаполисте де үш бөлмелі пәтерді жалдаудың орташа бағасы 500 мың теңге.

Жекелеген қалаларда өсім бұдан да жоғары. Павлодарда бір бөлмелі пәтер 28,6%-ға, Көкшетауда үш бөлмелі пәтер 30%-ға қымбаттаған. Қарағандыда бір бөлмелі пәтер бағасы шамамен 20%-ға, үш бөлмелі пәтер 22%-ға өскен. Қостанайда бір бөлмелі баспана 20%-ға қымбаттады.

Ал Қонаевта бір бөлмелі пәтерді жалдау ақысы 150 мыңнан 140 мың теңгеге дейін төмендеген. Екі бөлмелі пәтер 3%-ға қымбаттап, үш бөлмелі баспана бағасы өзгермеген.

Тәуліктік жалдау нарығында Алматыда екі бөлмелі пәтердің бағасы 22 мыңнан 23 мың теңгеге дейін, яғни 4,5%-ға өсті. Астанада бұл көрсеткіш өзгермеген.