«БҰҰ атына жиі сын айтылады, бірақ оның баламасы жоқ» – Тоқаев

Президент Қасым-Жомарт Тоқаев «ШЫҰ плюс» саммитінде Біріккен Ұлттар Ұйымын нығайтып, оның тиімділігін арттыру қажет екенін айтты.

Мемлекет басшысының сөзінше, БҰҰ атына жиі сын айтылғанымен, оның баламасы жоқ. Қазақстан БҰҰ халықаралық жүйенің өзегі, ал оның Жарғысы халықаралық құқықтың әмбебап негізі болып қалуға тиіс деп санайды.

«Кейбір сын орынды болса да, бәрібір бұл Ұйымның баламасы жоқ. Оны нығайту, тиімділігін арттыру – ортақ міндетіміз», – деді Тоқаев.

Президент БҰҰ-ның аймақтық ұйымдармен, соның ішінде ШЫҰ-мен тығыз ықпалдастығы осы мақсатқа сай келетінін атап өтті.

Тоқаев Қазақстан БҰҰ Бас хатшысы Антониу Гутерриштің халықаралық құқықты қорғауға қосқан үлесін жоғары бағалайтынын айтты. Оның пікірінше, Бас хатшының бастамасымен қолға алынған реформа БҰҰ-ның әмбебап сипатын сақтап, оны нақты нәтижеге бағытталған тиімді құрылымға айналдыруы керек.

Мемлекет басшысы орта державалардың рөлі артып келе жатқанына да тоқталды. Оның сөзінше, мұндай елдер түрлі күш орталықтары арасындағы диалогқа және ортақ шешімдер әзірлеуге ықпал ете алады.

«Олардың ұстанымдары мен бастамалары жаһандық басқару тетіктерінде барынша ескерілуге тиіс. Қазақстан бұл үдеріске белсене атсалысуға дайын», – деді Президент.

Тоқаев БҰҰ-ны институционалдық тұрғыдан жаңғырту үшін алдын алу дипломатиясын күшейту қажет екенін де айтты. Қазақстан биыл шілдеде Қытай бастамасын қолдап, Медиация жөніндегі халықаралық ұйым құру туралы конвенцияға мүше болған.