Тоқаев күш көрсету мен текетіреске негізделген әлемдік тәртіптен бас тартуға шақырды

Президент Қасым-Жомарт Тоқаев Бішкекте өткен «ШЫҰ плюс» саммитінде күш көрсету мен текетірестің орнына өзара жауапкершілік, бірлесе даму және ұзақмерзімді ынтымақтастыққа негізделген жаңа әлемдік тәртіп қалыптасуы керек екенін айтты.

Мемлекет басшысы Шанхай ынтымақтастық ұйымының көпжылдық тәжірибесі халықаралық ынтымақтастықтың тиімді үлгісін көрсеткенін атап өтті. Оның айтуынша, ұйымдағы теңдік пен ортақ келісім қағидаттары көпжақты ықпалдастықты дамытуға негіз бола алады.

«Күш көрсету культі мен конфронтация орнына өзара жауапкершілік, бірлесе даму және ұзақмерзімді ынтымақтастық салтанат құратын жаңа әлемдік тәртіп қалыптасуға тиіс», – деді Тоқаев.

Президент осыған байланысты ШЫҰ-ның негізгі қағидаттарын Халықаралық көпжақты ынтымақтастық және бейбітшілік жолындағы дипломатия күніне арналған БҰҰ Бас Ассамблеясының арнайы қарарында бекітуді ұсынды.

Тоқаев Қырғызстанның ШЫҰ-ға төрағалығын да жоғары бағалады. Оның сөзінше, Бішкек саммитінің қорытындысы ұйымды Еуразиядағы тұрақтылықты сақтайтын негізгі тетіктердің бірі ретінде одан әрі нығайтуға тиіс.