Путин халықаралық шиеленіске байланысты ҰҚШҰ-ның әскери әлеуетін күшейтуге шақырды

Ресей президенті Владимир Путин әлемдегі шиеленісті жағдайға байланысты Ұжымдық қауіпсіздік туралы шарт ұйымының (ҰҚШҰ) әскери әлеуетін арттырып, оған мүше мемлекеттердің қорғаныс саласындағы ынтымақтастығын күшейтуге шақырды. Бұл туралы ол 10 қарашада Мәскеуде ашылған Ұжымдық қауіпсіздікті қамтамасыз ету жөніндегі халықаралық форумға жолдаған үндеуінде мәлімдеді.

Ресей басшысының үндеуін форумда вице-премьер Алексей Оверчук оқып берді. Путин ұйымға мүше елдер қорғаныс саласындағы іс-қимылын үйлестіріп, терроризм мен экстремизмге, киберқылмысқа, есірткінің заңсыз айналымына және заңсыз көші-қонға қарсы күресті күшейтуі қажет екенін айтты.

«Халықаралық шиеленіс сақталып отырған жағдайда ұйымның әлеуетін одан әрі арттыру, алдымыздағы міндеттерді шешу жолындағы күш-жігерді үйлестіру маңызды. Ең алдымен, бұл қорғаныс, терроризм мен экстремизмге қарсы іс-қимыл, киберқылмыспен, есірткінің заңсыз айналымымен және заңсыз көші-қонмен күрес мәселелеріне қатысты», – деді Путин.

Оның айтуынша, форумға қатысушылар Еуразиядағы өңірлік қауіпсіздікті нығайту шараларын талқылауы тиіс.

Бұған дейін Ресей президенті ҰҚШҰ-ның ұжымдық күштерін заманауи ресейлік қару-жарақпен жабдықтаудың ауқымды бағдарламасын іске қосуды ұсынған еді. Путин бұл қару-жарақтың нақты ұрыс жағдайында тиімділігі дәлелденгенін мәлімдеген.

Сондай-ақ ол Ресейдің ұйымға төрағалығы кезіндегі басым міндеттердің қатарына әскери бөлімдердің жауынгерлік дайындығын арттыруды және ҰҚШҰ елдерінің қорғаныс кәсіпорындары арасындағы ынтымақтастықты дамытуды жатқызған.

11 қарашада Мәскеуде Владимир Путиннің төрағалығымен ҰҚШҰ саммиті өтеді. Жиында өңірлік қауіпсіздік мәселелерін талқылап, 2030 жылға дейінгі терроризмге қарсы стратегияны қабылдау жоспарланған. 2027 жылғы қаңтардан бастап ұйымға төрағалық ету кезегі Ресейден Тәжікстанға өтеді деп күтіліп отыр.

Саммит қарсаңында Ресей Арменияны мүшелік жарнасын төлемегені үшін ҰҚШҰ аясындағы дауыс беру құқығынан айыру мәселесін қарастыруды да ұсынды.

Армения 2024 жылы ұйымға қатысуын тоқтата тұрған. Ереван бұл шешімін Әзербайжанмен қақтығыс кезінде одақтастарының қауіпсіздікті қамтамасыз ету жөніндегі міндеттемелерін орындамағанымен түсіндірген. Армения премьер-министрі Никол Пашинян бұған дейін елінің ҰҚШҰ-ға қызығушылығы жоғалғанын мәлімдеген.

Ұжымдық қауіпсіздік туралы шарт ұйымына Ресей, Беларусь, Қазақстан, Қырғызстан, Тәжікстан және Армения мүше.

Еске салайық, 2022 жылғы қаңтарда Қазақстанда жаппай наразылықтар мен тәртіпсіздіктер болған кезде Президент Қасым-Жомарт Тоқаевтың өтініші бойынша ҰҚШҰ күштері елге енгізілген еді.