Қысқы дөңгелекке ауыспаған 744 жүргізушіні полиция тасжолға жібермеді

Ақмола облысында ауа райының қолайсыздығына байланысты жазғы дөңгелекпен жолға шыққан 744-тен астам жүргізуші кері қайтарылды. Бұл туралы облыстық полиция хабарлады.

8–9 қараша күндері өңірдегі республикалық маңызы бар бірқатар тасжолда жазғы дөңгелекпен жабдықталған көліктердің қозғалысына уақытша шектеу енгізілді. Атап айтқанда, Астана – Щучинск, Астана – Шідерті – Павлодар және Көкшетау – Атбасар бағыттарында осындай шаралар қабылданды.

Сонымен қатар ауа райы мен жол жағдайына байланысты республикалық тасжолдардың кейбір бөліктерінде рұқсат етілген ең жоғары жылдамдық төмендетілді.

Полицияның мәліметінше, жүргізушілерге қысқы дөңгелекке уақытылы ауысу қажеттігі бұған дейін бірнеше рет ескертілген. Соған қарамастан, кейбірі қарлы әрі көктайғақ жолға жазғы дөңгелекпен шыққан.

Тәртіп сақшылары жүргізушілерді қысқы дөңгелекке ауысуға, жылдамдықты асырмауға және қауіпсіз арақашықтықты сақтауға шақырды. Сондай-ақ сапарға шығар алдында ауа райы болжамы мен жолдағы шектеулерді нақтылауға кеңес берді.