Астанада қауіпсіздігі төмен 860 тұрғын үй нысаны бақылауға алынады

Астанада қауіпсіздік талаптарына толық сай келмейтін 860 тұрғын үй нысаны есепке алынған. Өткен қыста мұндай баспаналарда 30-ға жуық өрт болған. Бұл туралы 10 қарашада Үкімет отырысында Премьер-министр Олжас Бектенов мәлімдеді, деп хабарлайды Үкіметтің баспасөз қызметі.

Үкімет басшысының айтуынша, жұмыс іздеп, табыс табуға келген азаматтар көбіне қолайлылығы төмен, арзан баспана жалдайды. Мұндай үйлердің қауіпсіздік деңгейі төмен, ал кейбірі апатты жағдайда болуы мүмкін.

«Жұмыс іздеп, табыс табуға келген адамдар көп жағдайда қарапайым, арзан баспананы жалға алады. Ал ондай үйлердің қауіпсіздік деңгейі төмен, тіпті кейбірі апатты жағдайда болады. Атап айтқанда, тек елорданың өзінде осындай 860 нысан есепке алынған. Өткен қыста оларда 30-ға жуық өрт оқиғасы орын алған», – деді Олжас Бектенов.

Премьер-министрдің сөзінше, өрттің негізгі себептері – электр сымдарының қысқа тұйықталуы, отты абайсыз пайдалану және өрт қауіпсіздігінің қарапайым талаптарын сақтамау.

Осыған байланысты Үкімет басшысы әкімдіктерге Ішкі істер және Төтенше жағдайлар министрліктерімен бірлесіп, мұндай тұрғын үйлерді ерекше бақылауға алуды тапсырды.

Жауапты мекемелер жалға берілетін баспаналарды тұрақты түрде аралап, өрт шығу қаупін анықтауға және кемшіліктерді жою үшін жедел шаралар қабылдауға тиіс.

Сонымен қатар Үкімет отырысында студенттер тұратын жатақханалар мен хостелдердің, сондай-ақ білім беру нысандарының өрт қауіпсіздігіне назар аударылды. Әкімдіктер мен Төтенше жағдайлар министрлігіне тұрғын үй секторындағы өрт қауіпсіздігі айлығын қарашаның соңына дейін жалғастыру тапсырылды.

Үкімет басшысы жылыту маусымында тұрғындардың қауіпсіздігін қамтамасыз ету үшін өрттің алдын алу жұмыстарын тұрақты жүргізу қажеттігін атап өтті.