Кептеліс азаяды: Астанада екі жағалауды жалғайтын 16 миллиард теңгелік жаңа көпір салынады

Астанада екі жағалауды жалғап, қаладағы көлік кептелісін едәуір азайтатын жаңа көпірдің құрылысы жоспарлануда. Ауқымды инфрақұрылымдық жобаға 16,08 миллиард теңге бөлініп отыр.

Елорданың Есіл және Сарайшық аудандарын байланыстыратын су жаңа автомобиль көпірі Есіл өзені арқылы Шәмші Қалдаяқов көшесінен Т-3 көшесіне дейінгі аралықта бой көтереді. Сәйкес мемлекеттік сатып алу конкурсы 10 қарашада ресми түрде жарияланды. Тапсырыс беруші – Астана қаласының Көлік және жол-көлік инфрақұрылымын дамыту басқармасы. Мердігерлерден өтінім қабылдау 2026 жылдың 17 қарашасына дейін жалғасады.

Жобалау-сметалық құжаттамаға сәйкес, жаңа көпірдің ұзындығы 205,6 метрді құрайды. Онда ені 3,75-тен 4 метрге дейін жететін 6 жолақты автокөлік қозғалысы қарастырылған. Сонымен қатар, жаяу жүргіншілер мен велосипедшілер үшін ұзындығы 129,44 метр болатын 4 аспалы көпір тұрғызылады. Ал жоба аясында салынатын жол учаскесінің жалпы ұзындығы 881,35 метрге жетеді.

Жобаның тағы бір сенсациялық тұсы – оның бастапқы бағасының айтарлықтай арзандауында. Мемлекеттік сараптаманың қорытындысы бойынша, жобаның бастапқы құны 29,46 миллиард теңге деп бағаланған болатын. Алайда сараптамадан кейін ұсынылған сметалық құны 19,46 миллиард теңгеге дейін, яғни дерлік 10 миллиард теңгеге (34%-ға) төмендетілді.

Құрылыс жұмыстары шамамен 21 айға созылады. Мердігерге 30 пайыз көлемінде аванс беріліп, жол төсеміне 8 жыл, ал инженерлік желілерге 10 жыл кепілдік мерзімі қойылады.

Жаңа магистраль «Нұрлы жол» теміржол вокзалы мен Алматы ауданын сол жағалаумен қосады. Бұл инженерлік нысан Мәңгілік Ел, Сығанақ және Ұлы Дала даңғылдарындағы көлік тасқынын қайта бөліп, «Арыс» пен Тәуелсіздік даңғылындағы көпірлерге түсетін салмақты жеңілдетуге тиіс.