Құрылтай депутаттарының бастамасымен аймақтарды дамытуға қосымша 47 миллиард теңге бөлінді

Редакция
18 қараша 2026, 15:36
Құрылтай депутаттарының бастамасымен аймақтарды дамытуға қосымша 47 миллиард теңге бөлінді Сурет авторы: ЖИ иллюстрациясы

2027 жылғы республикалық бюджетте өңірлердің инфрақұрылымын дамытуға қосымша 47 миллиард теңге қарастырылды. Құрылтай депутаттарының бастамасымен бөлінген бұл қаржы еліміздің түкпір-түкпіріндегі 52 маңызды жобаны жүзеге асыруға бағытталады. Басты мақсат - қоғамдық кездесулерде халық көтерген өзекті мәселелерді шешу.

28,1 млрд теңге - жылу, жарық және газға

Қаржының басым бөлігі энергетика, жылу және газдандыру жүйелерін жаңғыртуға жұмсалады. Атап айтқанда:

  • Ақмола облысы: Қорғалжын ауданында жылу желілері, Көкшетауда ауыз су мен кәріз коллекторы салынып, Атбасарда орталық қазандық жаңартылады.

  • Алматы облысы: Еңбекшіқазақ ауданына газ құбыры мен тарату желілері тартылады.

  • Жамбыл облысы: Талас ауданында газ желілері, Таразда жаңа қосалқы станция бой көтереді.

  • Қарағанды облысы: Ақсу-Аюлы, Еркіндік, Өспен және Сәкен Сейфуллин ауылдарына газ тартылып, Абай ауданындағы магистральды жылу желісі жөнделеді.

  • Қостанай облысы: Қамысты ауданы газдандырылып, Арқалық пен Лисаковск қалаларының жылу желілері жаңғыртылады.

  • Қызылорда облысы: Жаңақорған ауданының Сунақата, Еңбек, Екпінді, Қожаберді және Сүттіқұдық ауылдарына көгілдір отын жеткізіледі.

  • Абай облысы: Семейдегі екі мектептің жылыту пункті, «Қуаныш» балабақшасынан Мәңгілік Ел көшесіне дейінгі және басқа да блокішілік жылу желілері мен трансформаторлар қайта жаңартылады.

  • СҚО және ШҚО: Новоишимское ауылында жылу желісі, Уәлиханов пен Ақжар аудандарында жоғары вольтты желі салынады, ал Өскеменде қазандық жаңартылады.

  • Маңғыстау, Жетісу және Ұлытау облыстары: Ақтауда жаңа қазандық, Текеліде жылу желілері жаңартылып, Ұлытауда газ құбыры мен Атасу автоматтандырылған газ тарату станциясы салынады.

Су тасқынынан қорғау және ауыз су

  • Атырау облысындағы Алға, Махамбет, Бейбарыс және Талдыкөл ауылдарын су тасқынынан қорғау үшін Жайық өзенінің жағалауын нығайтуға қосымша 2,5 млрд теңге бөлінді.

  • Қостанай, Түркістан және Ұлытау облыстарында ауыз су жүйелерін дамытуға 4,9 млрд теңге жұмсалады.

Әуежай, емхана және өңірлерді қолдау

  • Павлодар әуежайының терминалын қайта жаңартуға және Шымкентте бір ауысымда 500 адам қабылдайтын жаңа емхана салуға 2,5 млрд теңге бағытталмақ.

  • Ал Ақтөбе, Жетісу және Батыс Қазақстан облыстарындағы жобаларды мемлекеттік қолдауға қосымша 6,5 млрд теңге қарастырылды.

Соңғы жаңалықтар