ҚазҰУ-да студенттің өлімінен кейін проректор мен декан жұмыстан босатылды

Редакция
17 қараша 2026, 12:40
ҚазҰУ-да студенттің өлімінен кейін проректор мен декан жұмыстан босатылды Сурет авторы: wikipedia.org

Әл-Фараби атындағы Қазақұлттық университетінде студенттің өліміне байланысты дүмпу күшейді. Оқиғадан соң әлеуметтік және тұрақты даму жөніндегі проректор мен география және табиғат пайдалану факультетінің деканы қызметтерінен қуылды. Сондай-ақ оқиға күні кезекшілікте болған қызметкерлер де жұмыстан шеттетіліп, олардың әрекетіне құқықтық баға берілмек.

ҚазҰУ таратқан мәліметке сәйкес, бұл шешім тәрбие жұмысындағы өрескел қателіктер мен студенттер жатақханасындағы қауіпсіздік пен тәртіптің қамтамасыз етілмеуіне байланысты қабылданған.

«Біз бұл қазаның ата-ана мен жақындар үшін қаншалықты ауыр екенін терең түсінеміз және ортақ қайғыға ортақтасамыз. Университет марқұмның отбасымен байланыста болып, қажетті қолдау көрсетуге әрдайым дайын», - делінген хабарламада.

Қазіргі уақытта университеттегі барлық жатақханаларда кешкі бақылау күшейтіліп, студенттердің қауіпсіздігін қамтамасыз ету және кәсіби психологиялық көмек көрсету бойынша қосымша шаралар қолға алынды. ЖОО әкімшілігі ешқандай деректі жасырмайтынын, полициямен толық жұмыс істеп жатқанын және істің әділ қаралуына мүдделі екенін жеткізді.

16 қарашада ҚазҰУ студентінің қайтыс болғаны белгілі болды. Алдын ала мәліметтер бойынша, қайғылы жағдай түнде орын алған. Қазіргі таңда бұл оқиғаға қатысты жастар арасындағы төбелес және өзіне-өзі қол жұмсау секілді бірнеше болжам айтылуда. Алайда әзірге бұл нұсқалардың еμбірі де ресми түрде расталған жоқ.

Алматы қалалық полиция департаменті бұл дерек бойынша қылмыстық іс қозғалып, күдіктінің ұсталғанын хабарлады. Қазіргі уақытта тергеудің жан-жақтылығы мен объективтілігін қамтамасыз етуге бағытталған кешенді шаралар жүргізіліп жатыр.

Бұл университет қабырғасындағы жалғыз қасірет емес. 6 қараша күні кешке ҚазҰУ студенттер қалашығында журналистика факультетінің бірінші курс студенті көз жұмған болатын. Бойжеткен оқу үшін Шымкенттен Алматыға келген еді. Бұл факті бойынша да полиция қылмыстық іс қозғады.

11 қарашада Ғылым және жоғары білім министрі Саясат Нұрбек неліктен университет те, министрлік те бұл оқиғаға қатысты пікір білдірмегенін түсіндірді. Оның айтуынша, бұлай етуді полиция өтінген.

Соңғы жаңалықтар